१५ महिनामा मुख्यमन्त्री जम्कट्टेलले तेस्रो पटक पाए विश्वासको मत

१९ चैत, हटौंडा । बागमती प्रदेशका मुख्यमन्त्री शालिकराम जम्कट्टेलले प्रदेशसभाबाट तेस्रोपटक विश्वासको मत पाएका छन् । ३ माघ २०७९ मा पहिलोपटक विश्वासको मत लिएका मुख्यमन्त्री जम्कट्टेलले सोमबार पुनः विश्वासको मत लिएका हुन् ।
प्रदेश सभाको बैठकमा प्रस्तुत भएको मुख्यमन्त्री जम्कट्टेलको विश्वासको मतसम्बन्धी प्रस्तावको पक्षमा ५६ सांसदले मतदान गरेका हुन् । प्रदेश सभाका सभामुख भुवनकुमार पाठकले निर्णयार्थ प्रस्तुत गरेको विश्वासको मतसम्बन्धी प्रस्तावको पक्षमा सोमबारको बैठकमा उपस्थित १०८ सांसदमध्ये ५६ जनाले मतदान गरेका छन् । यसैगरी प्रस्तावको विपक्षमा ३७ जनाले मतदान गरे भने १५ जना सांसद तटस्थ बसेका थिए ।
मुख्यमन्त्री जम्कट्टेललाई प्रदेश सभामा प्रतिनिधित्व गर्ने सात दलमध्ये चार दलका सांसदले विश्वासको मत दिएका छन् । उनलाई विश्वासको मत दिनेमा एमाले, माओवादी केन्द्र, एकीकृत समाजवादी र हाम्रो नेपाली पार्टीका सांसद रहेका छन् ।
यसअघि सरकारमा रहेको कांग्रेस विश्वासको विपक्षमा मतदान गरेको छ भने राप्रपा र नेमकिपा तटस्थ बसेका थिए । मुख्यमन्त्री जम्कट्टेलले यसअघि ३ माघ २०७९ र गत १० चैतमा गरी पहिलो र दोस्रोपटक प्रदेश सभाबाट विश्वासको मत लिएका थिए ।