मकवानपुरगढी ४ स्थित फिर्केपाखा सिंचाईंको शिलान्यास

२४ बैशाख, हेटौंडा । मकवानपुरको मकवानपुरगढी गाउँपालिका ४ को फिर्केपाखा सिचाईं आयोजनाको शिलान्यास गरिएको छ । स्थानीयको सहजताको लागि निर्माण गर्न लागिएको सिचाईं आयोजनाको आइतबार एक कार्यक्रमकाबीच बागमती प्रदेशसभा सदस्य लक्ष्मीदेवी श्रेष्ठले शिलान्यास गरेकी हुन् । 
बागमती  प्रदेश सरकारको २० लाख रुपैयाँ बजेटमा निर्माण सुरु गरिएको आयोजनाबाट मकवानपुरगढी ४ का करिब ३ सय घरधुरी लाभान्वित हुने बताइएको छ । आयोजनाका लागि प्रत्येक वर्ष बजेट विनियोजन गरिने डिभिजन सिचाईं कार्यालयले प्रतिबद्धता जनाएको छ । 
आयोजनाको शिलान्यास गर्दै प्रदेश सांसद् श्रेष्ठले काम गर्ने क्रममा गुणस्तरलाई ध्यान दिन अनुरोध गरिन् । आगामी आर्थिक वर्षमा थप बजेटका लागि सम्बन्धित कार्यालयमा पहल गरिने उनको प्रतिबद्धता रहेको थियो । 
कार्यक्रममा मकवानपुरगढी गाउँपालिकाका अध्यक्ष दोर्जे लामा स्याङ्तानले पालिकाले लगानी गर्न नसक्ने योजनामा प्रदेश सरकारको सहकार्यको अपेक्षा व्यक्त गरे । 
फिर्केपाखा सिचाईं आयोजना उपभोक्ता समितिका अध्यक्ष राजाराम मोक्तानको अध्यक्षतामा भएको कार्यक्रममा नेपाली कांग्रेसका नेता यतिराज सापकोटा, आनन्दराम पराजुली, मकवानपुरगढी गाउँपालिका ४ नम्बर वडा अध्यक्ष अर्जुन तिमल्सिना, डिभिजन सिचाईं कार्यालयका ईन्जिनियर रक्षा पोखरेल, समाजसेवी सर्कलाल लो लगायतको आतिथ्यता रहेको थियो । 
उपभोक्ता समिति अध्यक्ष मोक्तानले यस आयोजनाबाट मकवानपुरगढी ४ नम्बर वडाबासी लाभान्वित हुने जानकारी दिँदै आगाी वर्ष विशेष बजेटको व्यवस्था गर्न अनुरोध गरे ।