बागमती प्रदेशमा आज सार्वजनिक बिदा

२४ बैशाख, हेटौंडा । बागमती प्रदेश सरकारले आज सार्वजनिक बिदा दिएको छ । प्रदेश सरकारको बैशाख १२ गते बसेको मन्त्रीपरिषद बैठकले आजबाट प्रदेश सरकारी कामकाजी भाषा ऐन २०८० कार्यान्वयनमा ल्याउने भएकाले सार्वजनिक बिदा दिने निर्णय गरेको हो ।
आज काठमाडौंको बसन्तपुरमा एक सार्वजनिक समारोहमार्फत प्रदेश सरकारी कामकाजी भाषा ऐन २०८० कार्यान्वयनमा आएको घोषणा गरिने भएको छ । पहिलो चरणमा सरकारी निकाय र स्थानीय तहको बोर्ड र लेटर हेडमा नेपाली भाषासहित तामाङ र नेपाल भाषा उल्लेख गरि कार्यान्वयन थालिनेछ । यसअघि गत २३ कातिकमा जारी गरिएको उक्त ऐनमा भएको व्यवस्था अनुसार वैशाख २४ गते कार्यान्वयन हुने भनिएको छ । 
सो ऐन राजपत्रमा प्रकाशित भएको १८० दिनमा कार्यान्वयन हुने प्रस्तावनामा उल्लेख गरिए बमोजिम प्रदेश सरकारले अघि बढेको हो । प्रदेशका नागरिकहरूमा संस्कृति र पहिचानको अपनत्व महसुस गराउन ऐन कार्यान्वयन हुने दिनमा बिदा दिइएको प्रदेश सरकारका प्रवक्ता एवंं मन्त्री गंगानारायण श्रेष्ठले बताए ।
उनले संविधानबमोजिम नेपाली भाषासँगै प्रदेशभित्र बहुसंख्यकले बोलिने तामाङ र नेपाल भाषालाई सरकारी कामकाजी भाषा निर्धारण गरी प्रदेश सरकारका निकायमा लागू गर्दै बागमती प्रदेशमा रहेका संघीय कार्यलयहरु र स्थानीय तहहरूमा लागु गर्न अनुरोध समेत गर्ने जानकारी दिए ।