बैशाख ३१ गते वजेट अधिवेशन आह्वान गर्न सिफारिस

२८ बैशाख, हेटौंडा । बिहीबार बसको बागमती प्रदेश मन्त्रिपरिषद बैठकले बागमती प्रदेश सभाको बर्खे अधिवेशन आह्वान गर्न सिफारिस गर्ने निर्णय गरेको छ । प्रदेश सरकारका प्रवक्त एवं आन्तरिक मामिला तथा योजना मन्त्री गंगानारायण श्रेष्ठका अनुसार प्रदेश सभाको बर्खे अधिवेशन ३१ वैशाखमा गर्ने गरी आह्वान गर्न सिफारिस गरिएको हो । 
बैठक वैशाख ३१ गते दिउँसो १ बजेका लागी आह्वान गर्न प्रदेश प्रमुख यादवचन्द्र शर्मा समक्ष सिफारिस गर्ने निर्णय गरेको हो । मन्त्रिपरिषदको सिफारिस अनुसार नै प्रदेश प्रमुख शर्माले बर्खे अधिवेशन आह्वान गर्ने मन्त्री श्रेष्ठको भनाई छ । बजेट अधिवेशनको रूपमा रहेको अधिवेशनबाट सरकारको नीति तथा कार्यक्रम, आगामी आर्थिक वर्षको बजेट संसदमा पेस गर्ने तथा छलफल गरी पारित गरिने छ । 
प्रदेश सभाको हिउँदे अधिवेशन गत वैशाख १२ गते राति १२ बजेबाट अन्त्य गरिएको थियो । यसैगरी मन्त्रिपरिषद बैठकले भौतिक पूर्वाधार विकास मन्त्रालय अन्तर्गतको कार्यालय स्थानान्तरण गर्ने निर्णय पनि गरेको छ । निर्णय अनुसार ग्रामिण सडक सञ्जाल सुधार आयोजना (आसिआइपीएफ)को कार्यालय हेटौंडाबाट भक्तपुर सारिने भएको छ । 
संघीय सरकारसंग समन्वय गर्न र उक्त कार्यालय अन्तर्गत कार्यान्वयन भइरहेको ६ वटा योजनाहरु कार्यान्वयन गराउन सहजता हुने भएकाले कार्यालय स्थानान्तरण गर्ने निर्णय गरिएको मन्त्री श्रेष्ठले बताए । 
बैठकले खरको छानो मुक्त बागमती प्रदेश कार्यक्रम संचालन पहिलो संशोधन स्वीकृत गरेको छ भने नमुना वडा समाजवादी कार्यक्रम कार्यान्वयन कार्यविधि २०८० को पहिलो संशोधन र लैगिंक समानता तथा सामाजिक समावेशीकरण परिक्षण मापदण्ड २०८१ पनि स्वीकृत गरेको छ । यसैगरी प्रदेश नीति तथा योजना आयोगमा रिक्त रहेका एउटा सदस्य पदमा दिपेन्द्र श्रेष्ठलाई नियुक्त गर्ने निर्णय गरिएको मन्त्री श्रेष्ठले बताए ।