हेटौंडामा आजबाट तीन दिने प्रदेशस्तरीय युवा सम्मेलन

२८ बैशाख, हेटौंडा । आजबाट हेटौंडामा तीन दिने बागमती प्रदेशस्तरीय युवा सम्मेलन हुँदैछ । बागमती प्रदेशको सामाजिक विकास मन्त्रालय अन्तर्गत प्रदेश युवा परिषद्ले युवालाई सामाजिक र सार्वजनिक जीवनमा सहभागी गराउँदै नवप्रवर्तन र उद्यमशीलता विकास गर्ने उद्देश्यका साथ दोस्रो संस्करणको प्रदेश युवा सम्मेलनको आयोजना गर्न लागेको हो । 
३० गतेसम्म सञ्चालन हुने तीनदिने सम्मेलनको तयारी पूरा भएको आयोजकले बताएको छ । युवा परिषद्ले अघिल्लो वर्ष पनि युवा सम्मेलनको आयोजना गरेको थियो । युवा सम्मेलनको तयारी करिब पूरा भएको र सहभागीहरु हेटौंडा आउने क्रम सुरु भएको प्रदेश युवा परिषद्का कार्यकारी उपाध्यक्ष सन्तोष चौलागाईंले जानकारी दिए । 
१३ जिल्लाका युवाको सहभागितामा हुन लागेको सम्मेलनमा २ सय भन्दा बढी १६ वर्षदेखि ३० वर्ष उमेर समूहका युवाको सहभागिता रहनेछ । सम्मेलनमा सहभागी युवालाई नै लक्षित गरी अन्तरक्रिया, वहस, कार्यशाला, सहभागीबीच आपसी सञ्जाल निर्माण, प्रेरक सन्दर्भको व्याख्या र नेतृत्व तथा व्यक्तित्व विकाससँग सम्बन्धित क्रियाकलापको आयोजना हुनेछ । 
युवालाई सामाजिक र सार्वजनिक जीवनमा सहभागी गराउँदै नवप्रवर्तन र उद्यमशीलतासँग जोड्ने मुख्य उद्देश्यका साथ कार्यक्रमको आयोजना गरिएको जानकारी दिँदै कार्यकारी उपाध्यक्ष चौलागाईंले यस वर्षको सम्मेलनलाई सभ्य र भव्य बनाउने गरी तयारी गरिएको बताए । यस वर्ष सम्मेलनमा सहभागी हुन चाहने ५३७ जना युवाले अनलाइनमार्फत आवेदन दिएका थिए । 
आवेदन दिएका मध्ये २०० जनालाई पूर्ण समावेशी अवधारणामा छनोट गरिएको बताइएको छ । सम्मेलनमा सहभागी हुने २०० जना बागमती प्रदेशको ११९ पालिकामध्ये ८९ पालिकाका युवा छानिएका छन् । युवा सम्मेलन क्षमता विकास तथा उद्यमशीलता र रोजगारीसँगै सीप विकासमा उपयोगी हुने आयोजकको विश्वास छ । 
युवा सम्मेलनमा विभिन्न विषयमा कार्यशाला तथा प्रश्तुतीकरण हुनेछ । सम्मेलनको अन्तिम दिन मुख्यमन्त्रीसँग युवा कार्यक्रम गरी समापन गरिनेछ । युवा सम्मेलन पश्चात ‘युवा सिप वर्ष २०८१’ घोषणा गर्ने तयारी रहेको बताइएको छ । यस वर्ष प्रदेशका ५ हजार युवालाई १० वटा क्षेत्रमा एक सय भन्दा माथिको पेशाका सीप सिकाएर सिप परीक्षण पश्चात टेवा पुँजी प्रदान गर्ने युवा परिषद्को तयारी छ ।