हेटौंडा १४ का वडाध्यक्ष दिपक खड्काद्वारा पत्रकारमाथि दुर्व्यवहार

१ जेठ, हेटौंडा। समाचार संकलनकालागि हेटौंडा -१४ को कार्यालय मयुरधाप पुगेका २ जना  संचारकर्मीहरुलाई हेटौंडा १४ का वडाअध्यक्ष दिपक खड्काले गरेको दुव्यवहारको विरोधमा नेपाल पत्रकार महासंघ मकवानपुर, नेपाल प्रेस युनियन र प्रेस सेन्टर मकवानपुरले ध्यानाकर्षण भएको जनाएको छ। 

मंगलबार बिहान वडा कार्यालयमा रहेका वडाध्यक्ष खड्काले समाचार संकलनका लागि वडा कार्यालय पुुगेका सौर्य दैनिकका मकवानपुर सम्वाददाता छविलाला श्रेष्ठ (अनित्य) र प्रदेश संचार अनलाइनमा कार्यरत पत्रकार मन्जिता मैनालीमाथि गालीगलौज गर्दै दुर्व्यवहार गरेको पत्रकार अनित्यले सामाजिक संजाल फेसबुकमा उल्लेख गरेका थिए। 

पत्रकार अनित्यले वडाध्यक्ष खड्कासंग वडा भित्र रहेका ६ जना चेपाङ बालबालिकालको जन्मदर्तासंग सम्बन्धित विषयको बारेमा बुझ्न खोज्दा  ‘सबै पत्रकार चोर हुन’ भन्दै वडाध्यक्षको कार्यकक्षबाट थुतेर बाहिर निकाल्ने धम्की दिएको बताए ।

'खड्काले गालीगलौज  गर्दा अडियो रेकर्ड गर्न लाग्दा हाम्रो मोबाइल समेत नियन्त्रणमा लिने प्रयास भयो' -पत्रकार अनित्यले भने। 

मकवानपुरको दुईजना पत्रकारलाई समाचार संकलनका क्रममा कार्यकक्षमै गालीगलौज र दुर्व्यवहारका विषयलाई लिएर नेपाल पत्रकार महासंघ मकवानपुरले विज्ञप्ति जारी गरि ध्यानाकर्षण भएको जनाएको छ। महासंघ मकवानपुर अध्यक्ष मणिराज गौतमले पत्रकारलाई गालीगलौज गर्नु निन्दनीय भएको र समाचार संकलनका वातावरण बनाउन सरोकारवाला निकायलाई अनुरोध समेत गरेको छ।

त्यसैगरी घटनाको विषयमा नेपाल प्रेस युनियन मकवानपुर र प्रेस सेन्टर मकवानपुरले विज्ञप्ति जारी गर्दै घटनाको विरोध गरेका छन्। वडाध्यक्ष खड्का नेकपा एमालेबाट दोस्रो कार्यकालका लागि निर्वाचित वडाध्यक्ष हुन्।