मनहरीको नीति तथा कार्यक्रम:पत्रकारलाई फिल्ड भिजिट, विपन्नलाई दाहसंस्कार खर्च

५ असार, हेटौंडा। मकवानपुरको मनहरी गाउँपालिकाले आगामी आर्थिक वर्ष २०८१। ०८२मा  शिक्षा, स्वास्थ्य, कृषिलाई विशेष प्राथमिक दिदै सामाजिक र पूर्वाधार विकास देखि विपन्न परिवारलाई दाहसंस्कारका लागि आर्थिक सहयोग गर्ने निती सार्वजनिक गरेको छ। 

बुधबार गाउँपालिकाको १५ औ गाउँसभामा  नीति तथा कार्यक्रम सार्वजनिक गर्दै गाउँपालिका अध्यक्ष रञ्जन कालाखेतीले यस्तो बताएका हुन् ।विद्यालयबाट विपन्न परिवारका विद्यार्थीलाई निःशुल्क शिक्षा प्रदान गर्ने निती सहित विपन्न, लोपोन्मुख जाति वनकरिया, चेपाङ, आदिवासी जनजाति, जेष्ठ नागरिकका लागि हित हुनेगरी समृद्ध मनहरीको सपना साकार बनाउने र गाउँपालिकाले नीति तथा कार्यक्रममा शिक्षा, स्वास्थ्य र भौतिक पूर्वाधारलाई विशेष जोड दिएको छ । 

गाउँपालिकाले एक वडा एक कृषि उत्पादन कार्यक्रम, उपयोगिता, माटो परीक्षण प्रयोगशाला निर्माण र निःशुल्क माटो परीक्षणको व्यवस्था गरिने जनाइएको छ।  कृषि तथा पशुपन्छी सम्बन्धी प्राविधिक सेवा नागरिकका घरदैलोमा पहुँच पु¥याउन दरवन्दी अनुरुपका कर्मचारी पदपुर्ति गर्ने, सार्वजनिक बाँझो जमिनमा खेति गरी उत्पादन बढाउने नीति लिइने भएको छ । मनहरीले खेलकुद क्षेत्रमा फुटबल एकेडेमी संचालनका लागि सम्भाव्यता अध्ययन गर्ने, अध्यक्ष कप फुटबल र उपाध्यक्ष कप भलिबल प्रतियोगितालाई निरन्तरता दिने आगामी आर्थिक वर्षको नीति तथा कार्यक्रममा उल्लेख गरिएको छ। 

त्यसैगरी स्वास्थ्य तर्फ गर्भवती महिलाका आधारभूत जाँच र भिडियो एक्सरे निःशुल्क र मोतिविन्दुका बिरामी फेला परे निःशुल्क शल्यक्रियाको व्यवस्था मिलाइएको छ। त्यसैगरी गाउँपालिकाले आगामी आर्थिक वर्षमा संचारकर्मीसंग फिल्ड भिजिट कार्यक्रमलाई निरन्तरता दिएको छ। गाउँपालिकाले चालु प्रकृतिक खर्च घटाइ मितव्ययीता कायम गर्ने नीति सार्वजनिक गरेको छ। प्रत्येक वडाको बजार क्षेत्र तथा मुल बाटोमा वैकल्पिक उर्जा सोलार बत्ती जडान गर्ने,न्यायिक कार्यलाई लैङ्गिक समावेशीय बनाइने उल्लेख गरेको  छ ।