हेटौंडा ७ पनि भदौ १ गते बालमैत्री वडा घोषणा हुदै

घोषणा बारे जानकारी गराउन आयोजना गरिएको पत्रकार भेटघाट

२९ साउन, हेटौंडा। हेटौंडा उपमहानगरपालिकाको वडा नम्बर ८ र २ पछि वडा नम्बर ७ निकृष्ट बालश्रम मुक्त, बाल विवाह मुक्त तथा बाललमैत्री स्थानीय शासनयुक्त वडा घोषणा हुने भएको छ । 

बालमैत्री स्थानीय शासन कार्यान्वयन निर्देशिका २०७८ ले निर्दिष्ट गरेका ५१ वटा सूचक पूरा गरेकोले यहि भदौ १ गते शनिबार हेटौंडाको तेस्रो बालमैत्री स्थानीय शासनयुक्त वडाका  रुपमा घोषणा हुन लागेको हो । वडा नम्बर ७ को कार्यालयले मंगलबार पत्रकार भेटघाटको आयोजना गर्दै यस बारेमा जानकारी गराएको हो। 

पत्रकार भेटघाटमा बोल्दै वडाध्यक्ष दामोदर गौतमले वडा नम्बर ७ ले बालमैत्री स्थानीय शासन कार्यान्वयन निर्देशिका २०७८ ले निर्दिष्ट गरेका ५१ वटा सूचक पूरा गरेकोले वालमैत्री वडा घोषणा गर्न लागिएको बताएका छन् ।

वडाध्यक्ष गौतमले तोकिएका सूचक सूचकहरुमध्ये ४६ वटा सूचकहरु सतप्रतिशत र बाँकी सूचकमा ९० प्रतिशत भन्दा बढी नतिजा हासिल गरेको समेत बताएका छन्। भदौ १ गते शनिबार हेटौंडा ७ स्थित नवज्योती मा विको चौरमा मेयर मिना कुमारी लामा र   उप मेयर राजेश बानियाँको विशिष्ट आतिथ्यमा बाल मैत्री वडा घोषणा गरिने जनाइएको छ। यसका लागि सबै तयारी पूरा भएको वडा सदस्य दिनेश थापामगरले जानकारी दिएका छन्।

शनिबार बिहान वडा कार्यालयबाट झाकी सहित वड परिक्रमा गरी नवज्योती मा विको चौरमा बाल मैत्री वडा घोषणा गरिने  वडा सदस्य श्याम सुन्दर परियारले बताएका छन्। उनले वडामा १८ वर्ष मुनिका १ हजार ८ सय ९८ बालबालिका रहेका छन् । १० वटा बालसमूहरु र १ वडा बाल सञ्जाल रहेको कुरा उल्लेख गरेका थिए। 

पत्रकार भेटघाटमा बालमैत्री घोषणा पश्चात् यसको दिगोपनाका लागि लगानी योजना र पञ्चवर्षे रणनीतिक योजना दस्तावेज तयार पारिएको हेटौंडा उपमहानगरपालिकाकी महिला बालबालिका तथा समावेशीकरण महाशाखाकी प्रमुख विष्णुकुमारी लामिछानेले जनाइन्। पत्रकार भेटघाटमा वडा सदस्य सन्तुमाया पाख्रिन, राधिका विक र वडा सचिव भैरव बहादुर कुमाल लगायल वाल सहजकर्ताको सहभागिता रहेको थियो।