एक पक्षको प्रयासले मात्र परिवर्तन सम्भव छैन: मूख्यमन्त्री लामा

२ असोज, हेटौंडा । बागमती प्रदेशका मूख्यमन्त्री मुख्यमन्त्री बहादुर सिंह लामाले एक पक्षको प्रयासले मात्र परिवर्तन सम्भव नरहेको बताएका छन् ।
गैरसरकारी संस्था महासंघ बागमती प्रदेश समितिको आयोजनामा बुधबार हेटौंडामा भएको नागरिक सम्मेलनमा बोल्दै मुख्यमन्त्री लामाले यस्तो धारणा राखेका हुन् । 
मुख्यमन्त्री लामाले सुधारको प्रक्रिया सबै पक्षबाट हुनुपर्नेमा जोड दिए । उनले-'केवल एक पक्षको प्रयासले मात्र परिवर्तन सम्भव छैन । सरकार, गैसस र नागरिक समाज सबैले आ-आफ्नो क्षेत्रमा सुधार गर्नुपर्छ'-उनले भने । 
हाल ऐन कानूनको अभावमा गैससहरूसँग समन्वय गर्न समस्या भइरहेको बताउँदै उनले यसका लागि एउटा दीर्घकालीन सोचसहितको ऐन निर्माण गर्नुपर्ने आवश्यकता रहेको बताए । 
उनले गैससहरूको संख्या एकीन गर्नुपर्ने आवश्यकतामाथि जोड दिँदै गैससहरूको वास्तविक संख्या थाहा नभई तिनीहरूको कार्यलाई प्रभावकारी ढंगले अगाडि बढाउन कठिन हुने बताए । यसका लागि एक व्यवस्थित तथ्यांक संकलन र विश्लेषण आवश्यक  रहेको उनको भनाई थियो ।
नागरिक सवालहरूलाई प्रभावकारी ढंगले सम्बोधन गर्न सरकार, गैसस र नागरिक समाजबीच घनिष्ठ समन्वय र सहकार्य अपरिहार्य रहेकोमा लामाको जोड थियो ।
कार्यक्रममा मूख्यमन्त्री लामालाई ११ बुँदे नागरिक पत्र बुझाइएको थियो ।
गैसस महासंघ बागमती प्रदेशका कार्यवाहक अध्यक्ष कमलकुमार विश्वकर्माको सभाध्यक्षतामा भएको कार्यक्रममा गैसस महासंघका केन्द्रीय अध्यक्ष रामप्रसाद सुवेदीसहित केन्द्र, प्रदेश र जिल्ला कार्यसमिति, प्रदेशसभा सदस्य लक्ष्मी श्रेष्ठ, जिसस मकवानपुरका प्रमुख ललित घलान, विभिन्न जिल्लाका गैरसरकारी संस्थाका प्रतिनिधि, नीजि क्षेत्र, नागरिक संघसंस्था र पत्रकारहरूको सहभागिता रहेको थियो ।