हेटौंडा सिमेन्ट उद्योगको तार चोरी

२ कार्तिक, हेटौंडा । हेटौँडा-९ लामसुरेमा नेपाल सरकारको स्वामित्वमा रहेको सिमेन्ट उद्योगको क्रसरको तार चोरी भएको छ ।
क्रसरमा प्रयोग भएका विभिन्न प्रकारका करिब १ सय ५० मिटर तामाको तार चोरी भएको जनाइएको छ । यो घटना असोज २२ गते राति २ बजेको भएपनि बुधबार जिल्ला प्रहरी कार्यालय मकवानपुरमा चोरीको निवेदन परेपछि घटना सार्वजनिक भएको हो । मकवानपुरका प्रहरी प्रवक्ता प्रहरी नायब उपरीक्षक श्यामु अर्यालले चोरी भएको निवेदन प्रहरी कार्यालयमा आएको र घटनाको अनुसन्धान शुरु भइसकेको जनाइएको छ । 
उद्योगका सुरक्षागार्डका अनुसार १०/१२ जना युवाहरूको समूहले तार चोरी गरेर लगेको भन्ने जनाएको र यस विषयमा अनुसन्धान भइरहेको प्रहरीले जनाएको छ । उद्योग परिसर इलाका प्रहरी कार्यालय पशुपतिनगरबाट करिब २ किलोमिटर क्षेत्रमा पर्छ, इप्रका पशुपतिनगरमा प्रहरी निरीक्षकको नेतृत्व रहेको छ ।
घटनाले सुरक्षा गार्ड र उद्योग प्रशासनको कमजोरी देखिएको छ । उद्योग क्षेत्रमा बागमती प्रदेश सरकारका मन्त्रीहरूको क्वाटर समेत रहेको छ । मकवानपुर प्रहरीले ढिला गरी घटनाको जानकारी आएकोले अनुसन्धान भइरहेको जनाएको छ।यता उद्योगको सुरक्षाका लागि बज्र सेक्युरिटी कम्पनीलाई जिम्मेवारी दिइएको छ । सेक्युरिटी कम्पनीको कमजोरीका कारण चोरी भएको उद्योग प्रशासनले जनाएको छ। चोरी भएको तारको बजार मूल्य करिब १० लाख रहेको जनाइएको छ।