इन्द्रसरोवरमा इभि भ्यान दुर्घटना:३ को अवस्था गम्भीर

२० असार,हेटौंडा । भिमफेदी - कुलेखानी सडकखण्ड अन्तर्गत मकवानपुरको ईन्द्रसरोवर गाउँपालिका वडा नम्बर २ रातोमाटेमा यात्रु बोकेको इभी भ्यान दुर्घटना हुदा ५ जना घाइते भएका छन् भने घाइते मध्ये ३ जनाको अवस्था गम्भीर रहेको छ। 
शुक्रबार दिउँसो हेटौंडाबाट काठमाडौं जाँदै गरेको मधेश प्रदेश ०३-००१ ज ०५५१ नम्बरको इभी भ्यान  भीमफेदी कुलेखानी काठमाण्डौ सडक खण्ड अन्तर्गत ईन्द्रसरोवर गाउँपालिका- २ रातमाटेमा दुर्घटना भएको हो ।
गाडीमा सवार १० जना मध्ये ५ जना घाइते भएको तीमध्ये तीन जना गम्भीर घाइते रहेको मकवानपुर प्रहरी प्रवक्ता प्रहरी नायब उपरीक्षक श्यामु अर्यालले जनाएका छन् ।घाइते हुनेमा पर्साको जिराभवानी गाउँपालिका– ३ का ३५ वर्षीय चन्द्र सन्जु गौर, भारतको विहारका ३९ वर्षीय रिसाहद कुमार र भारत विहारकै ३५ वर्षीय उमा शंकर कुमार रहेको र उनीहरूको अवस्था गम्भिर रहेको छ।

त्यस्तै दुर्घटनामा भारतको विहारका २७ वर्षीय जताशंकर कुमार र ५० वर्षीय राकेश कुमारको अवस्था सामान्य रहेको छ। उनीहरुलाई उपचारका लागि काठमाडौं पठाइएको प्रवक्ता अर्यालले जानकारी दिए। प्रहरीले इभी चालकलाई नियन्त्रणमा लिएर आवश्यक अनुसन्धान सुरु गरिसकेको जनाएको छ।