८ र ९ वडा मेयर कपको क्वार्टरफाइनलमा

२४ फागुन, हेटौँडा । हेटौंडामा जारी तेस्रो मेयर कप फुटबल प्रतियोगितामा ८ नम्बर वडाको राजपानी क्लव र ९ नम्बर वडाको कुष्माण्ड सरोवर टिम क्वार्टरफाइनलमा प्रवेश गरेको छ । विहिबार भएको खेलमा राजपानीले १९ नम्बर वडाको चनौटा तपोवन क्लवलाई र ९ कुष्माण्डले सहीद स्मृति शान्ति पार्क टिम हेटौँडा–६ लाई हराउँदै क्वार्टरफाइनलमा प्रवेश गरेका हुन् । कुष्माण्डले शान्ति पार्क टिमलाई ४–१ गोल अन्तरले हराएको हो । कुष्माण्डको तर्फबाट चौथो मिनेटमा डेबिट लामा, १९ औं मिनेटमा अभिषेक मगर, कम्तान अमिर श्रेष्ठले २९ र ३८ औं मिनेटमा गोल गरे । ४४ औं मिनेटमा सहीद स्मृति शान्ति पार्कको तर्फबाट सन्देश दुलालले सान्त्वना गोल गरेका थिए । खेलको म्यान अफ दी म्याच कुष्माण्ड टिमका अमिर श्रेष्ठ भए । यस्तै, दोस्रो खेलमा ८ नम्बर वडाको राजपानी टिमले १९ नम्बर वडाको चनौटा तपोवन क्लवलाई ३–० गोल अन्तरले हराउँदै अघिल्लो चरणमा प्रवेश गरेको हो । राजपानीको तर्फबाट सुमन थापाले दुई र अस्मिर वाइबाले एक गोल गरे । खेलको म्यान अफ दी म्याच राजपानीका विजय घलान भए । प्रतियोगितामा शुक्रबार सेमीफाइनल प्रवेशको लागि १० नम्बर वडा र ११ नम्बर वडाको बीचमा पहिलो खेल हुनेछ भने दोस्रो खेल १ नम्बर वडा र २ नम्बर वडाको बीचमा हुनेछ ।