हेटौंडाको मेनरोडमा २० गतेबाट सवारी संचालनमा रोक

११ मंसिर, हेटौंडा । सडक विस्तार कार्यका लागि हेटौंडाको मुख्य बजार क्षेत्रमा मंसिर २० गतेदेखि सवारीसाधनको आवागमनमा पूर्ण रोक लगाइने भएको छ । सडक छेउका संरचना भत्काएर विस्तार कार्य अघि बढाउन यो व्यवस्था गरिएको हो।
वैकल्पिक मार्ग तयारी अन्तिम चरणमा सडक विस्तारका कारण हुने असुविधा न्यूनीकरण गर्न बाइपास मार्ग तयार पार्ने काम तीव्र गतिमा अघि बढेको छ । यसका लागि प्रमुख जिल्ला अधिकारी बसन्त अधिकारी र डिभिजन सडक कार्यालयका प्राविधिकहरूले चौकीटोलदेखि रातोमाटेसम्मको बाइपास मार्गको निरीक्षण गरेका छन् । बाइपास मार्गमा आवश्यक मर्मत कार्य गरेर वैकल्पिक यातायात व्यवस्था सुचारु गरिनेछ जनाइएको छ।
मुख्य बजारमा सवारी आवागमन बन्द भएपछि हेटौंडाबाट काठमाडौं र भैंसेतर्फ जाने सवारीसाधनलाई वैकल्पिक मार्ग प्रयोग गराइने व्यवस्था मिलाइएको छ। यी सवारी चौकीटोल हुँदै राप्ती नदी उकास क्षेत्र, राप्ती पुल, त्रिवेणीधाम भएर रातोमाटेतर्फ जाने गर्नेछन्।
समयमै संरचना नहटाए डोजर चलाइने चेतावनी
डिभिजन सडक कार्यालयले मंसिर ५ मा जारी गरेको १५ दिने सूचनाको अवधि मंसिर १९ मा सकिँदैछ। कार्यालयका प्रमुख गुरुप्रसाद अधिकारीले संरचना नहटाएमा मंसिर २० गते बिहानैदेखि डोजर परिचालन गरी सडक विस्तारको काम सुरु गरिने बताए।
हाल वडा नम्बर १५ रातोमाटेबाट मार्किङ कार्य सुरु भइसकेको छ।
सडक विस्तार कार्यलाई व्यवस्थित ढंगले सञ्चालन गर्न विभिन्न निकायका प्रतिनिधि सम्मिलित टास्क फोर्स गठन गरिएको छ। हेटौंडा उपमहानगरपालिका, जिल्ला प्रहरी कार्यालय, नापी कार्यालय, खानेपानी व्यवस्थापन बोर्ड, वन कार्यालय, नेपाल विद्युत् प्राधिकरण र दूरसञ्चार प्राधिकरणका प्रतिनिधि यसमा छन्।
प्रमुख जिल्ला अधिकारी अधिकारीले सडक विस्तारको क्रममा विद्युत्, खानेपानी र टेलिफोन सेवामा अवरोध नआओस् भनेर सम्बन्धित निकायसँग निरन्तर समन्वय भइरहेको जानकारी दिए।स्थानीयवासीलाई सडक विस्तार कार्यमा सहयोग गर्न र वैकल्पिक मार्ग प्रयोग गर्न प्रशासनले आग्रह गरेको छ।