३ नम्बर प्रदेशको राजधानी हेटौँडा नै हुन्छ : देउवा

४ बैशाख, हेटौँडा । पूर्व प्रधानमन्त्री शेरबहादुर देउवाले ३ नम्बर प्रदेशको राजधानी हेटौँडा नै हुने भन्दै ढुक्क हुन आग्रह गरेका छन् । देउवाले आफु प्रधानमन्त्री हुँदा प्रदेशको अस्थायी मुकाम हेटौँडालाई तोकेको भन्दै प्रदेश राजधानी पनि हेटौँडा नै हुने दावि गरे । ३ प्रदेशको राजधानी हेटौँडा कायम गर्न मागसहितको ज्ञापनपत्र बुझाउन गएको टोलीको ज्ञापनपत्र बुझ्दै उनले यस्तो बताएका हुन् ।
उनले आफुले अन्यत्र स्थानान्तरण गर्नका लागि मुकाम नतोकेको भन्दै हेटौँडा नै ३ नम्बर प्रदेशको राजधानी हुने दावि गरे । नेपाली कांग्रेस यसबारे सकारात्मक रहेको भन्दै अन्य दलका शिर्ष नेतृत्वसंग पनि पहल थाल्न देउवाको सुझाव थियो । जिल्ला समन्वय समिति मकवानपुरका प्रमुख रघुनाथ खुलालले देउवालाई ज्ञापनपत्र बुझाएका थिए । 
ज्ञापनपत्र बुझाउन मकवानपुरका प्रतिनिधिसभा सदस्य विरोध खतिवडा, ३ नम्बर प्रदेश नेपाली कांग्रेस संसदीय दलका नेता ईन्द्रबहादुर बानियाँ, प्रदेशसभा सदस्य प्रेमबहादुर पुलामी, जुनेली श्रेष्ठ, जिल्ला समन्वय समितिका उपप्रमुख भगवति पुडासैनी, मकवानपुर उद्योग बाणिज्य संघका अध्यक्ष कृष्ण कटुवाल, नारायणी यातायात व्यवसायी संघका महासचिव सरोज खनाल लगायतको टोली पुगेको थियो ।