बंशगोपाल माविलाई पूर्ण सरसफाईयुक्त घोषणा गरिने

२१ जेठ, हेटौँडा । हेटौँडा–६ चौघडामा रहेको बंशगोपाल माविलाई पूर्ण सरसफाई युक्त विद्यालय घोषणा गरिने भएको छ । विद्यालयलाई आगामी बर्षको विश्व वातावरण दिवसका दिन पूर्ण सरसफाईयुक्त र जंगफुडरहित विद्यालय घोषणा गरिने भएको छ ।

अभियानको सोमबार शुभारम्भ कार्यक्रम गरिएको छ । शुभारम्भ कार्यक्रममा बोल्दै विद्यालय व्यवस्थापन समितिका अध्यक्ष श्यामप्रसाद श्रेष्ठले विद्यालय परिसर र कक्षा कोठा कागज र प्लाष्टिकरहित बनाउने, जंगफुड निषेध गर्ने र फोहर निषेध गरिने बताए । विद्यालयको वातावरण समितिको आयोजनामा भएको कार्यक्रममा ६ नम्बर वडाका अध्यक्ष अर्जुनप्रसाद चौलागाई, शिक्षक अभिभावक संघका अध्यक्ष शिवदयाल यादव लगायतले मन्तव्य व्यक्त गरेका थिए । कार्यक्रमको उद्देश्यमाथि विद्यालयका प्रधानाध्यापक रमेशप्रसाद लामिछानेले प्रकाश पारेका थिए । विद्यालयले सोमबार नै ‘सफा कक्षाकोठा, जंगफुडरहित विद्यालय प्रवेश हाम्रो अभिभारा’ विषयक वक्तृत्वकला प्रतियोगिताको आयोजना गरेको छ ।

प्रतियोगितामा कक्षा ९ का रोशन अधिकारी प्रथम, कक्षा १० की सिर्जना खड्का दोस्रो, कक्षा १० कै प्रयास पुडासैनी तृतिय भएका छन् । शिक्षक, विद्यार्थी र विद्यालय व्यवस्थापन सबैको एकिकृत प्रयासमा १ बर्षभित्र विद्यालयलाई जंगफुडरहित र पूर्ण सरसफाईयुक्र घोषणा गरिने वातावरण समितिका संयोजक रामकृपाल साहले बताए ।