कोलम्बियालाई हराउँदै इंग्ल्याण्ड विश्वकपको क्वार्टरफाइनलमा

२० असार, हेटौँडा । कोलम्बियालाई पेनाल्टी शुटआउटमा ४–३ गोलअन्तरले पराजित गर्दै इंग्ल्याण्ड जारी विश्वकपको क्वार्टरफाइनलमा प्रवेश गरेको छ ।
रुसको सेन्ट पिटर्सवर्ग रंगशालामा निर्धारित र अतिरिक्त समयमा दुवै टोलीले एक एक गोलको बराबरी खेलेपछि नजतिजा पेनाल्टी शुटआउटबाट निकालिएको हो । पेनाल्टीमा इंग्ल्याण्डका एक खेलाडी चुक्दा कोलम्बियाका दुई खेलाडीले पेनाल्टीमा गोल गर्न सकेन ।
कोलम्बियाका आन्द्रेस युरिवको पेनाल्टी क्रसबारमा लागेको थियो भने कार्लोस बाक्काको प्रहार इंग्लिस गोलकिपर जोर्डन पिकफोर्डले बचाएका थिए । 
यस्तै कोलम्बियाका कप्तान रामाडेल फाल्काओ, लुइस मुरियल र जुहान कार्डाडोले गोल गरे भने इंग्ल्याण्डका कप्तान ह्यारी केन, मार्कोस राशफोर्ड, केरन ट्रिपियर र इरिक डायरले गोल गरे ।
यसअघि निर्धारित समयमा विवादास्पद पेनाल्टीमा ह्यारी केनले गोल गरेपछि इंग्ल्याण्डले १–० को अग्रता लिएको थियो । कोलम्बियाली डिफेण्डर कार्लोस सान्चेसले डिबक्सभित्र इंग्लिस कप्तान केनलाई फल गरेपछि इंग्ल्याण्डले खेलको ५७औं मिनेटमा पेनाल्टीको अवसर पाएको थियो ।
यस्तै नियमित समयमा थपिएको ५ मिनेटको इन्ज्यूरी समयको तेस्रो मिनेटमा कोलम्बियाका जुहान कुआड्रार्डोको कर्नरमा स्टार डिफेण्डर यारी मिनाले गोल गरी खेलमा शनशनीपूर्ण बराबरी गरेपछि खेल अतिरिक्त ३० मिनेटको समयमा पुगेको थियो । 
इंग्ल्याण्डले विश्वकपमा सन् १९९० यता तेस्रो पटक नकआउट खेल जितेको हो ।
(एजेन्सी)