यसरी हुँदैछ हेटौँडामा चंगा चेट प्रतियोगिता

१७ असोज, हेटौँडा । नेपालीहरुको महानपर्व दशैंको अवसरमा हेटौंडामा यसवर्ष चंगा चेट प्रतियोगिता हुने भएको छ ।

जीवन कल्याण तथा सहजीकरण संस्था हेटौंडा–४ को आयोजनामा चेट प्रतियोगिता हुन लागेको हो । हेटौंडा–१ जरुवाटोलस्थित खुला मैदानमा असोज २७ गते हुने प्रतियोगितामा ६५ जनाले सहभागिता जनाउने आयोजकले गरेको छ । ‘संस्कृतिको जगेर्ना गर्ने र प्रतियोगिताबाट बचेको रकम हाम्रो संस्थाको उद्देश्य प्राप्तिका लागि खर्चेने गरी कार्यक्रम आयोजना गरिएको संस्थाका अध्यक्ष रविन्द्र शाहीले जानकारी दिए ।

उनका अनुसार प्रतियोगिताको विजेताले नगद दशहजार रुपियाँसहित ट्रफि प्राप्त गर्नेछ । द्वितीय र तृतीयलाई नगद पाँचहजार र दुईहजार पाँचसय रुपियाँ, आकर्षक चड्डा र उत्कृष्ट उडान भर्नेलाई समेत ट्रफिको व्यवस्था गरिएको शाहीले बताए । प्रतियोगितामा सहभागी हुनका लागि दर्ता शुल्क एक हजार रुपैँया तोकिएको छ । सहभागी सवैलाई चंगा, लटाई र  टी–सर्ट प्रदान गरिनेछ भने धागो सहभागी स्वयम्ले ल्याउनुपर्ने छ । २०७० सालमा स्थापना भएको संस्थाले हेटौंडाको श्रमिक मावि, ज्ञानदा मावि, बाराही आधारभूत विद्यालय लालझाडी, सिद्धार्थ उमावि, सरस्वती निमावि मक्राञ्चुलीमा २१ जना विद्यार्थीलाई छात्रबृत्ति प्रदान गर्दै आइरहेको छ ।

छात्रबृत्ति प्रदान गर्नका लागि बार्षिक करिब एक लाख १५ हजार रुपैंया खर्च हुने गरेको शाहीले जानकारी दिए ।