अन्तर्राष्ट्रिय रोटरी एट ए साईडको उपाधी ध्रुवतारालाई

६ कार्तिक, हेटौंडा । हेटौँडामा जारी दोश्रो अन्तर्राष्ट्रिय रोटरी ‘एट ए’ साइड फुटवल प्रतियोगिताको उपाधी ध्रुवताराले हात पारेको छ ।हेटौँडाको सिद्धार्थ उच्च माविको खेल मैदानमा शनिवार भएको फाईनलमा काठमाण्डौँको क्लव मोसेसलाई पराजित गर्दै चितवनको ध्रुवताराले उपाधिमाथि कब्जा गरेको हो ।
प्रतियोगितामा निर्धारित तथा अतिरिक्त समयमा दुबै पक्षबाट गोल हुन नसकेपछि खेल ट्राइब्रेकरमा पुगेको थियो । ट्राइब्रेकरमा पनि मोसेस र ध्रुवताराले ३–३ गोलको बराबरी गरेका थिए । त्यसपछि भएको सडअन डेथमा चितवका यम गुरुङ र राजेन्द्र श्रेष्ठले गोल गरे भने काठमाण्डौका उमेश थापाले मात्र गोल गरे भने आशिष रानाको बल गोल हुन सकेन । 

ध्रुवताराले उपाधि सहित नगद ४० हजार, शिल्ड मेडल तथा प्रमाणपत्र प्राप्त गर्दा उपविजेता मोसेसले २० हजार नगद सहित शिल्ड मेडल तथा प्रमाणपत्र प्राप्त गर्यो । खेलमा ४ गोल गरेका आयोजक रोटरी क्लबका सञ्जय थापा सर्वाधिक गोलकर्ता भए भने खेलमा म्यान अफ द सिरिज चितवनका राजेन्द्र श्रेष्ठ भए । श्रेष्ठले दुबइको दोहोरो टिकट प्राप्त गरे ।

कार्तिक २ गतेबाट भएको प्रतियोगितामा नेपाल र बंगलादेशको गरि ११ वटा टिमहरुको सहभागिता रहेको थियो । प्रतियोगितामा विजयी टिमलाई मध्यमाञ्चल क्षेत्रीय प्रशासक विनोद केसीले पुरस्कार वितरण गरेका थिए । ४० बर्ष भन्दा माथिको प्रतियोगितालाई रोटरी क्लब अफ मकवानपुरले आयोजना गरेको थियो ।