सरकारविरुद्ध आन्दोलन चर्काउने नेतृ भुसालको चेतावनी

२१ माघ, हेटौँडा । सरकारले अधिनायकवादी कार्यशैली देखाएको भन्दै नेपाली कांग्रेसले प्रदेश नम्बर ३ को राजधानी हेटौँडामा सोमबार प्रर्दशन गरेको छ ।
कार्यक्रममा बोल्दै नेपाली कांग्रेसकी केन्द्रीय सदस्य एवं संघीय संसदकी सचेतक पुष्पा भुसालले केपि ओली नेतृत्वको सरकार सबै क्षेत्रमा असफल भएको बताइन् । उनले सरकारले एक बर्षमा आर्थिक समृद्धिको काम गर्न नसकेको, भ्रष्टाचार नियन्त्रण गर्न नसकेको, शान्ति सुरक्षा कायम गर्न नसकेको र अन्तराष्ट्रिय कुटनीतिक मर्यादा समेत कायम गर्न नसकेको बताईन् । उनले कम्युनिष्ट सरकारले संविधान र संसदीय अभ्यासलाई कमजोर पार्न खोजे कांग्रेसले संसद र सडकबाट खबरदारी गर्ने चेतावनी दिईन् । 
कार्यक्रममा बोल्दै नेपाली कांग्रेस प्रदेश ३ का संसदीय दलका नेता एवं मकवानपुर सभापति ईन्द्रबहादुर बानियाँले वर्तमान कम्युनिष्ट सरकार आएपछि गरिबी र भ्रष्टाचार चरम विन्दुमा पुगेको र विकास खर्च २० प्रतिशत पनि नभएको बताए । उनले जनताको हितमा काम गर्न नसक्ने, विकास गर्न नसक्ने, महंगी घटाउन नसक्ने, शान्ति सुरक्षा कायम गर्न नसक्ने सरकारविरुद्ध आन्दोलनको विकल्प नभएको बताए ।
नेपाली कांग्रेस मकवानपुरले गरेको विरोध प्रर्दशनमा सहभागीहरुले अधिनायकवादी कार्यशैली रोक्नुपर्ने, संसदीय मर्यादा कायम हुनुपर्ने, भ्रष्टाचार नियन्त्रण गर्नुपर्ने, निर्मला पन्तलाई न्याय दिनुपर्ने, डा. गोविन्द केसीको माग पुरा हुुनपर्ने लगायतका नारा लगाएका थिए । सभा अघि हेटौँडाको ४ वटा नाकाबाट ¥यालीसहित प्रर्दशन गरिएको थियो ।