विजय युथ क्लबलाई लट्टीनाथको प्रायोजन

२५ चैत, हेटौंडा । मोफसलको चर्चित फुटबल क्लब विजय युथ क्लब हेटौंडालाई लट्टीनाथ निर्माण कम्पनी प्रालिले प्रायोजन गरेको छ ।
सिमरा गोल्डकपको विजेता समेत रहेको मकवानपुरको सवैभन्दा सफल फुटबल क्लब विजय युथलाई लट्टीनाथले प्रायोजना गरेको हो । क्लबका व्यवस्थापक राजेश भेटवाल र कम्पनीका सञ्चालक रविकुमार श्रेष्ठबीच भएको सहमति अनुसार अब क्लबको नाम लट्टीनाथ विजय युथ फुटबल क्लब रहेनछ । सहमति अनुसार मोफासलमा सञ्चालन हुने विभिन्न प्रतियोगितामा सहभागी हुँदा लट्टीथान विजय युथ क्लबको नाममा सहभागी हुनेछ । प्रायोजनबापत्को रकम भने खुलाइएको छैन ।
‘हामीले मकवानपुरमा लामो समयदेखि फुटबलको विकासका लागि काम गरिरहेका छौं । यस सम्झौतालाई दीर्घरुप दिने विषयमा छलफल भइरहेको छ ।’, क्लबका अध्यक्ष सुदिप राजबाहकले भने । उनका अनुसार क्लबले सहमतिपश्चात् पाँचथरमा जारी राष्ट्रिय फुटबल प्रतियोगितामा सहभागिता जनाउँदैछ । पाँचथरको फिदिममा हुने फिदिम गोल्डकप फुटबल प्रतियोगिताको पहिलो खेलमा विजय युथले चैत २७ गते  ए डिभिजन क्लब जावलाखेलसँग प्रतिस्पर्धा गर्नेछ ।
विजय युथको प्रशिक्षकको रुपमा सुविन घिमिरे रहेका छन् । टोलीमा हेटौंडा सहित देशका चर्चित अनुहार र विदेशी खेलाडीको समिश्रण रहेको छ । यसपटक प्रतियोगिता च्याम्पियन बन्ने दाउमा क्लब रहेको बताइएको छ ।