चेन्नई आईपीएलको फाइनलमा, दिल्ली ६ विकेटले पराजित

२८ वैशाख, हेटौँडा । चेन्नई सुपर किंग्स भारतमा जारी इण्डियन प्रिमियर लिग (आइपीएल) को फाइनलमा प्रवेश गरेको छ । ओपनर फाप डुप्लेसिस र शेन वाट्सनले अर्धशतकीय पारी खेलेपछि दिल्ली क्यापिटल्सलाई ६ विकेटले पराजित गरी चेन्नई फाइनलमा प्रवेश गरेको हो । 
विसाखापट्टनममा भएको दोस्रो क्वालिफायर खेलमा १४८ रनको लक्ष्य चेन्नईले १९ ओभरमा ४ विकेट गुमाएर पुरा ग¥यो । ओपनर डुप्लेसिस र वाट्सन दुवैले समान ५०÷५० रनको पारी खेले । 
चेन्नईका लागि अम्बाती रायडु अविजित २० रन, सुरेश रैना ११, र कप्तान महेन्द्र सिंह धोनीले ९ बनाए ।
यसअघि टस हारेर पहिले ब्याटिङ गरेको दिल्लीले निर्धाति २० ओभरमा ९ विकेट गुमाएर १४७ रनको बनाएको थियो । दिल्लीका ऋषभ पन्तले सर्वाधिक ३८ रन बनाएका थिए । यस्तै दिल्लीका लागि कोलिन मुनरोले २७, शिखर धवनले १८, कप्तान श्रीयास आयरले १३, शेरफान रथरफोर्डले १० र इशान्त शर्माले पनि १० रनको योगदान दिए ।
बलिङतर्फ चेन्नईका लागी दीपक चहर, हरभजन सिंह, रविन्द्र जडेजा र ड्वायन ब्राभोले समान २–२ विकेट लिए । 
अब उपाधिका लागि चेन्नईले आइतबार मुम्बई इण्डियन्ससँग प्रतिस्पर्धा गर्नेछ । पहिलो क्वालिफायरमा मुम्बईसँग नै हारेपछि चेन्नईले दोस्रो क्वालिफायर दिल्लीसँग खेल्नुपरेको हो ।
यी दुई टोलीले अहिलेसम्म तीन तीन पटक आईपीएल जितेका छन् । मुम्बईले २०१३, ०१५ र १७ मा उपाधि जितेको थियो भने चेन्नाईले सन् २०१०, ०११ र ०१८ मा उपाधि जितेको थियो । (एजन्सी)