बारामा हावाहुरी,पर्सामा चट्याङ लागेर एकको मृत्यु पाँच घाइते

२६जेठ, जितपुर । चैत १७ गते आएको बिनासकारी हावाहुरीले थलिएको बारा जिल्लामा आईतबार साँझ आएको हावाहुरीले जिल्लाको बिभिन्न स्थानमा क्षती पुर्याएको छ । पानी संगै आएको हावा हुरीले विभिन्न स्थानमा रुखहरु ढलेका छन भने  हावाहुरीले बिद्युतका पोल ढाल्दा जिल्लाको विभिन्न स्थानमा विद्युत आपुर्ती समेत बन्द भएको  जिल्ला प्रहरी कार्यालय बाराले जनाएको छ । हुरीसहितको पानीले पुर्याएको क्षतीको बिवरण संकलन कार्य भैरहेको जिल्ला प्रहरी कार्यालय बाराले जनाएको छ ।

त्यसैगरी आइतवार साँझ वर्षासँगै आएको हावाहुरी र चट्याङ लागेर पर्सामा एक जनाको मृत्यु भएको छ भने पाँच जना घाइते भएका छन् । आइतवार साँझ वर्षासँगै परेको चट्याङ लागेर ठोरी गाउँपालिका १ मा चट्याङ लागेर २१ वर्षीय राजु विष्टको मृत्यु भएको पर्सा प्रहरीले जनाएको छ । उनलाई खेतमा भैँसी चराउन गएका बेला चट्याङ लागेको थियो ।   
त्यसैगरी गरी हावाहुरीका कारण वीरगन्ज महानगरपालिकामा  ७ रामटोलमा महेस साहको निर्माण भइरहेको घरको पर्खाल भत्किदा त्यसमा च्यापिएर स्थानीय १६ वर्षीय ओमप्रकाश साह, १८ वर्षीय दिपेन्द्र पटेल र १५ वर्षीय सुनिल पटेल तथा वीरगन्ज १६ इनरुवामा नेक महम्मदको आफ्नै घर भत्किदा १४ वर्षीया छोरी गुल्सन खातुन र ३८ वर्षीया पत्नी शायदा खातुन घाइते भएका हुन्।  घाइते पाँचैजनाको नारायणी अस्पतालमा उपचार भइरहेको पर्सा प्रहरीले जनाएको छ ।