काठमाडौं–निजगढ दू्रतमार्ग निर्माणको लागत बढ्न सक्ने

९ असार, हेटौँडा । संसदीय समितिले काठमाडौं–निजगढ दू्रतमार्ग निर्माणको काम तोकिएकै समयमा सम्पन्न गर्न नेपाली सेनालाई निर्देशन दिएको छ । 
संघीय संसदको विकास तथा प्रविधि समितिले सोमबारको बैठकमा आयोजनाको कामलाई सहज बनाउन प्रधानमन्त्री तथा मन्त्रीपरिषद कार्यालयमा पेश गरेको विस्तृत परियोजना प्रतिवेदन (डिपीआर) स्वीकृत गरेर तत्काल नेपाली सेनालाई दिन सरकारलाई पनि सचेत गराएको छ । 
बैठकमा सो आयोजनाका प्रमुख सरदलाल श्रेष्ठले डिपीआर मन्त्रीपरिषद बैठकबाट स्वीकृत नभएकाले सो आयोजनाको पुल र सुरुङ निमाणको कामलाई बढाउन समस्या भएको जानकारी गराएका थिए । 
आयोजनाको पछिल्लो कार्य प्रगति विवरणलाई हेरेपछि समयमै सम्पन्न गर्न नेपाली सेनालाई निर्देशन दिनु परेको समितिकी सभापति कल्याणी खड्काले बताईन ।
बैठकमा समितिका सदस्यहरुले सो आयोजनाको लागत र समय दुवै बढने भन्दै चिन्ता व्यक्त गरेका थिए । 
आयोजनाको हालसम्म कार्यप्रगति विवरण समितिमा पेश गर्दै आयोजना प्रमुख एवम् नेपाली सेनाका उपरथी श्रेष्ठले डिपीआर स्विकृतिमा ढिलाई भए सो आयोजनाको पुल र सुरुङ निर्माणको काम प्रभावित हुने जानकारी गराए । 
नेपाली सेनाले सुरुङ निर्माणका कारण सो आयोजनाको लागत बढन सक्ने पनि अनुमान गरेको छ ।