कृषि तथा वन बिज्ञान बिश्वबिद्यालयको शैक्षिक भवनको शिलान्यास(फोटो फिचर सहित)

९ असार, हेटौँडा । कृषि तथा वन बिज्ञान बिश्वबिद्यालयको शैक्षिक भवनको   शिलान्यास गरिएको छ । हेटौंडा १० मा ९ करोड ८८ लाख रुपैयाँ लागतमा निर्माण हुन लागेको २० वटा कोठा सहितको ५ तल्ले भवनको सोमबार शिलान्यास गरिएको हो । प्रदेश नम्बर ३ का मुख्यमन्त्री डोरमणि पौडेलले सोमबार बिहान एक समारोहका बिच शैक्षिक भवनको शिलान्याश गरेका हुन । लामो समयदेखि विवादमा अल्झिएको  विश्वविद्यालयको शैक्षिक भवन  शिलान्यास भएसंगै भवन अभाबको  समस्या झेल्दै आएको विश्वविद्यालयले छुटकारा पाउने भएको छ । 
२० कोठे भवनमा कक्षा कोठा, पुस्तकालय, प्रयोगशाला, सेमिनार हल निर्माण हुने कृषि तथा वन बिज्ञान बिश्वबिद्यालय हेटौंडाका डिन डाक्टर बलराम भट्टले बताए । कलेज हातामा करिब २ कठ्ठा जमिनमा २० कोठा सहितको ५ तले सुविधा सम्पन्न भवन निर्माण हुने बताइएको छ । सरकारले कुल एकसय ५८ बिगाहा क्षेत्रफल मध्ये ६० बिगाहा जमिन कृषि तथा वन विज्ञान विश्वविद्यालयलाई दिएको थियो। 

कृषि तथा वन बिज्ञान बिश्वबिद्यालयका उपकुलपति प्राध्यापक डाक्टर इश्वरी प्रसाद ढकालको अध्यक्षतामा भएको शिलान्यास कार्यक्रममा मकवानपुर क्षेत्र नम्बर १ का सांसद तथा अर्थ समितिका सभापति कृष्ण प्रसाद दाहाल, राष्ट्रिय सभाका सदस्य रामचन्द्र राई, प्रदेश नम्बर ३ का उद्योग, पर्यटन, वन तथा वातावरण मन्त्री अरुण प्रसाद नेपाल, प्रदेश ३ कांग्रेस संसदिय दलका नेता इन्द्रबहादुर बानियाँ, प्रदेश ३ का सांसदहरु प्रेमबहादुर पुलामी, जुनेली श्रेष्ठ, पुर्ब सांसदहरु ललित बस्नेत, सुभाषचन्द्र ठकुरी, जिल्ला समन्वय समिति मकवानपुरका उपप्रमुख भगवती पुडासैनी, बिश्वबिद्यालयका रजिष्टार प्राध्यापक डाक्टर मनराज कोलाक्छपति लगायतकाको आतिथ्यता रहेको थियो ।