नेकपामा असन्तुष्टि, प्रदेशसभा सूचना टाँसेर सारियो

११ असार, हेटौँडा । सत्तापक्षीय दल नेकपाका सांसद बजेट विनियोजनबारे असन्तुष्ट भएपछि प्रदेशसभाको बैठक सूचना टाँसेर सारिएको छ ।
बुधबार विहान ११ बजेका लागि बोलाईएको प्रदेशसभा बैठक प्रदेशसभा सचिवालयले सूचना टाँसेर सारेको हो । मंगलबार पनि मूख्यमन्त्री डोरमणी पौडेल चितवन गएका कारण बैठक ३ बजेका लागि सारिएको थियो । पौडेल आएपछि बैठक शुरु भएको थियो ।
बुधबार विहान बोलाईएको नेकपाको संसदीय दलको बैठकमा प्रदेशसभा सदस्यहरुले बजेट विनियोजनप्रति असन्तुष्टि व्यक्त गरेका थिए । प्रदेशसभामा बोल्ने क्रममा समेत असन्तुष्टि व्यक्त गरेका उनीहरुले संसदीय दलको बैठकमा समेत बजेट विनियोजनप्रति आपत्ति जनाएको एक सांसदले बताए ।
उनका अनुसार मन्त्रीहरुले आफु र केही निश्चित सांसदको क्षेत्रमा मात्रै बजेट विनियोजन गरेकोमा नेकपाका सांसदहरुको आपत्ति छ । बैठक लम्बिएका कारण यसको असर प्रदेशसभा बैठकमा पनि परेको छ । विहान ११ बजेपछि सम्म पनि कुनै पनि नेकपा सांसद प्रदेशसभा आएको देखिएका थिएनन् । ११ बजे संचालन गर्नुपर्ने बैठक ११ः३० मा सांसदहरुलाई म्याजेस गरेर समय परिवर्तनको जानकारी दिईएको थियो । प्राविधिक कारण देखाएर बैठक दिउँसो १ बजेसम्मका लागि सारिएको छ ।