प्रदेशसभामा फेरि उठ्यो स्थायी राजधानीको विषय

११ असार, हेटौँडा । ३ नम्बर प्रदेशको प्रदेशसभा बैठकमा प्रदेशको स्थायी राजधानीको विषय चर्किएको छ । प्रदेशसभा भवन हेटौँडामा बुधबार बसेको बैठकमा ५ जना सांसदहरुले यसबारे विषय उठान गरेका थिए ।
नेपाली कांग्रेसका सांसद निमा लामाले स्थायी राजधानी र नामाकरणको विषय टुंगो लगाउन आग्रह गरे । नेकपाका सांसद चन्द्र लामाले राजधानीको विषय टुंग्याउन सभामुखलाई के कुराले अप्ठ्यारो पर्यो जवाफ दिन आग्रह गर्दै स्थायी राजधानीको विषय टुंगोमा नपुग्ने अवस्थाको अन्त्य हुनपर्ने बताए ।
त्यस्तै नेकपाकै सांसद लक्ष्मण लम्सालले राजधानीको विषयमा छलफल गर्नुपर्ने बताए । उनले प्रतिपक्षले पठक पटक आवाज उठाईसकेको बताउँदै यसतर्फ चासो दिन ध्यानाकर्षण गराए । नेकपाका सांसद रत्न ढकालले पनि राजधानी विषय यथाशिघ्र टुंगिनुपर्नेमा जोड दिए । उनले राजधानीको विषय सम्बोधन नभई अरु विषयमा अघि बढ्न नहुने समेत धारणा राखेका थिए ।
नेकपाकै सांसद राजकाजी महर्जनले राजधानीको विषय टुंगोमा पुर्याउनुपर्ने बताउँदै अर्काको काँधमा बन्धुक राखेर पड्काउने काम भईरहेको बताए ।
यसअघि मंगलबारको प्रदेशसभा बैठकमा प्रमुख प्रतिपक्षी दल नेपाली कांग्रेसका नेता ईन्द्रबहादुर बानियाँलाई अकंगणितीय हिसावमा नेकपाको दुई तिहाई रहेको अवस्थामा राजधानीको टुंगो लगाउन नसक्नु दुर्भाग्य भएको बताए । राजधानीबारे मूख्यमन्त्री र आफ्नो मिलेमतो रहेको भन्दै आरोपको खण्डन गर्दै उनले आफुहरुले पटक पटक यसबारे आवाज उठान समेत वेवास्ता भएको बताए । उनले सभामुख र सम्पूर्ण सांसदको प्रतिष्ठासंग जोडिएको विषयलाई प्रक्रियामा लैजान सभामुखलाई समेत सुझाव दिएका थिए ।