जिल्ला लिगमा अध्यक्ष र पूर्वअध्यक्षको क्लब दर्ता भएन

२९ असार, हेटौँडा । साउनको अन्तिम साता हुने भनिएको मकवानपुर जिल्ला फुटबल लिगमा वर्तमान अध्यक्ष र पूर्व अध्यक्षकै क्लव दर्ता भएको छैन । असार २९ गतेसम्म जिल्ला लिगका लागि जिल्ला फुटबल संघका क्लव दर्ता गर्ने अन्तिम समय भएपनि दुबै जनाको क्लव दर्ता नभएको हो । 
असार २१ गतेसम्मको समयसिमा क्लवहरुकै आग्रहमा असार २९ गतेसम्म पुर्याएपनि दुबै क्लव दर्ता नभएको संघ स्रोतले जनाएको छ । वर्तमान अध्यक्ष टिका लामाको क्लव एफसी पोताला र पूर्व अध्यक्ष राजेन्द्र श्रेष्ठको क्लब सानोपोखरा क्लव दर्ता भएका छैनन् । संघका नेतृत्वले नै लिगमा आफ्नो क्लव दर्ता नगर्नुलाई संघभित्रको विवादको रुपमा हेरिएको छ । दुबैले अहिलेसम्म आफ्नो धारणा सार्वजनिक नगरेपनि यसले लिगको समयमै हुनेमा समेत आशंका उव्जिएको एक सदस्यले बताए ।
संघका पदाधिकारीहरुबीच देखिएको विवादकै कारण एन्फा मकवानपुरले असार पहिलो हप्ता आयोजना गर्नुपर्ने विद्यालयस्तरीय फुटबल प्रतियोगितासमेत गर्न सकेको छैन । ४५ जिल्लामा जिल्ला लिग भइसक्दा समेत मकवानपुरले अझै गर्न सकेको हो । संघमा देखिएको समस्याका कारण मकवानपुरको फुटबल क्षेत्रमै नकारात्मक असर पर्ने हो कि भन्ने चिन्ता फुटबलप्रेमीले गरेका छन् ।