रानी सामुदायिक वनलाई वन्यजन्तु संरक्षण पुरस्कार

३ साउन, हेटौँडा । हेटौँडा–६ चौघडामा रहेको रानी सामुदायिक वन उपभोक्ता समूहलाई वन तथा वन्यजन्तु संरक्षण तथा व्यवस्थापन पुरस्कार प्रदान गरिने भएको छ । 
जिल्ला समन्वय समिति,मकवानपुरका प्रमुख रघुनाथ खुलालको अध्यक्षतामा बसेको बैठकले सो पुरस्कार दिने निर्णय गरेको हो । विश्वमा नै लोपोन्मुख एवम संरक्षणको सूचीमा रहेको सालक संरक्षणमा उल्लेख्य काम गर्दै आएकोले रानीलाई यो पुरस्कार दिन लागिएको जनाईएको छ ।
यसैगरी अशोक सामुदायिक वनको संस्थापक अध्यक्ष हेटौडा–१७ का कृष्णप्रसाद नेपाल र चुच्चेखोला सामुदायिक वनका कार्यालय सचिव हेटौडा–६ का केदारप्रसाद गौतमलाई पनि यो पुरस्कार प्रदान गरिने छ । पुरस्कारको राशी समूहलाई १० हजार र व्यक्तिलाई जनही ६/६ हजार रहेको छ । यो पुरस्कार प्रदेश सरकारले प्रदान गर्नेछ ।
कबुलियती वन तर्फ देउराली कबुलियती वन बाग्मती–७ प्रथम, रामधुनी कबुलियती वन हेटौडा–१८ द्वितिय र ढदाधारी कबुलियती वन मकवानपुरगढी–७ तृतिय भएका छन् । पुरस्कारको राशी प्रथमलाई ८ हजार द्धितीयलाई ६ हजार र तृतिय ४ हजार ५  रहेको छ । 
यसैगरी संघिय सरकार अन्तरगत सामुदायिक वनतर्फ सुन्दर सामुदायिक वन हेटौडा–१ प्रथम, काली बेदघारी सामुदायिक वन बाग्मती–८ द्धितिय र त्रिवेणी सामुदायिक वन बाग्मती –१ तृतिय भएका छन । पुरस्कारको राशी पहिलोलाई ७ हजार ५ सय दोश्रोलाई ६ हजार र तेश्रोलाई ४ हजार रहेको सहायक वन अधिकृत बसन्तराज गौतमले जानकारी दिए ।
विजयी सामुदायिक वन, कबुलियती वन र व्यक्तिहरुलाई कार्यक्रमको आयोजना गरी पुरस्कार र प्रमाणपत्र वितरण गरिने कार्यालयले जनाएको छ ।