टी–२० एसिया विश्वकप छनोटः नेपालको विश्वकप खेल्ने सपना अधुरै

१२ साउन, हेटौँडा । आगमी वर्ष अष्ट्रेलियमा हुने टी–२० विश्वकप खेल्ने नेपालको सपना अधुरै भएको छ । आईसीसी टी–२० एसिया विश्वकप छनोट खेलमा सिंगापुरसँग ८२ रनले पराजित भएसँगै नेपालको विश्वकप खेल्ने सपना अधुरो भएको हो ,
आयोजक सिंगापुरले दिएको १ सय ९२ रनको विजयी लक्ष्य पछ्याएको नेपाल १५ ओभरमा अल आउट हुँदै १ सय ९ रनमा समेटियो । ओपनर ज्ञानेन्द्र मल्लले ३९ रन बनाउन बाहेक अन्य कुनै पनि खेलाडीले राम्रो प्रर्दशन गर्न सकेनन् ।
नेपालका लागी सन्दीप लामिछाने र दीपेन्द्र सिंह ऐरीले समान २३ रन बनाउँदा कप्तान पारस खड्काले १२ रन, सोमपाल कामीले ११ रन, विनोद भण्डारीले ९ रन, शरद भेषवकरले ७ रन र रोहित कुमार पौडेल ५ रन बनाए ।
नेपाललाई सस्तैमा रोक्ने क्रममा सिंगापुरका विजय कुमारले ४ विकेट लिए भने विनोथको नाममा २ तथा जनक प्रकाश, अनन्थ कृष्ण, मम्जाद महबुबले १–१ विकेट लिए ।
त्यसअघि टस जितेर पहिला ब्याटिङ गरेको सिंगापुरले निर्धारित २० ओभरमा ६ विकेट गुमाउँदै १ सय ९१ रन बनाएको थियो । उसका लागि खेलाडी युवा टिम डेविडले ७७ रनको महत्वपूर्ण योगदान दिए । यस्तै सिंगापुरका लागी रोहन रङ्गराजन ४९ रन र मनाप्रित सिंहले ४२ रन बनाए । नेपालका लागि अभिनाष बोहोराले ४ तथा करण केसीले २ विकेट लिए ।
नेपाललाई हराउँदै च्याम्पियन बनेको सिंगापुर पहिलो पटक ग्लोबल छनोटमा पुगेको छ । ग्लोबल छनोट आगमी अक्टोबरमा यूएईमा हुने छ ।