प्रदेशबाट २ वटा विधेयक पारित, अधिवेशन अन्त्य

२५ भदौ, हेटौँडा । ३ नम्बर प्रदेशको प्रदेशसभा बैठकबाट २ वटा विधेयक पारित भएको छ । बुधबार बसेको बैठकबाट २ वटा विधेयक सर्वसम्मत पारित भएको हो ।
बैठकमा उद्योग, पर्यटन, वन तथा वातावरण मन्त्री अरुण नेपालले पेश गरेको उद्योग, पर्यटन तथा वातावरण समितिको प्रतिवेशनसहितको प्रदेश औद्योगिक व्यवसाय सम्बन्धमा व्यवस्था गर्न बनेको विधेयक सर्वसम्मत पारित भएको छ ।
त्यसैगरी, आर्थिक मामिला तथा योजना मन्त्री कैलाश ढुंगेलले पेश गरेको अर्थ तथा विकास समितिको प्रतिवेदनसहितको सार्वजनिक नीजि सहकारी साझेदारी सम्बन्धी विधेयक सर्वसम्मत पारित भएको छ । विधेयकमाथि छलफल गर्दै सांसद रिना गुरुङले विधेयक पास गर्ने क्रम छिटो भएको र पर्याप्त छलफल हुन नसकेको बताईन् । उनले नीजि क्षेत्रलाई पनि यसविषयमा समावेश गरिनुपर्नेमा उनको जोड थियो । 
त्यसैगरी, सांसद विजया श्रेष्ठ केसीले नीजि र सहकारीसंगको साझेदारीका लागि छुट्टाछुट्टै नियमावली निर्माण हुनुपर्ने बताईन् । उनले सूचना र प्रविधिको क्षेत्रमा साझेदारीलाई प्रवद्र्धन गर्नुपर्नेमा जोड दिनुपर्ने धारणा राखिन् । 
सांसद नारायणबहादुर सिल्वालले विधेयक व्यापक छलफल गरेर आएको र कार्यान्वयनका क्रममा देखिएका समस्या समाधानका लागि तत्पर हुनुपर्ने बताए । जवाफ दिंदै मन्त्री ढुंगेलले उद्योग बाणिज्य क्षेत्रका संस्थाहरुलाई समेट्ने प्रतिवद्धता व्यक्त गरे । उनले काम गर्दै जाँदा देखिने कमजोरीलाई संशोधन गर्दै जाने बताए ।
यससंगै बर्षे अधिवेशन अन्त्य भएको प्रदेश प्रमुख कार्यालयको सूचना पढेर सभामुख सानुकुमार श्रेष्ठले सुनाएका थिए ।