'छड्के'मा ३७ कर्मचारी अनुपस्थित

३ माघ, हेटौडा । मकवानपुरका ४ वटा सरकारी कार्यालयमा भएको अनुमगन (छड्के) मा ३७ जना कर्मचारी अनुपस्थित भएको पाईएको छ । जिल्ला प्रशासन कार्यालय मकवानपुरले पुस २९ र माघ २ गते गरेको अनुगमनमा ३७ जना अनुपस्थित पाईएको हो ।

प्रशासनले नापि कार्यालय, जिल्ला वन कार्यालय, मालपोत कार्यालय र नेपाल विद्युत प्राधिकरण वितरण केन्द्र हेटौँडामा अनुगमन गरेको थियो । अनुगमनमा सबैभन्दा बढि प्राधिकरणमा २३ जना कर्मचारी अनुपस्थित पाईएको सहायक प्रमुख जिल्ला अधिकारी हरिप्रसाद पन्तद्वारा जारी विज्ञप्तिमा उल्लेख छ । विज्ञप्तिमा नापिमा ७, मालपोतमा ५ र वनमा २ जना कर्मचारी अनुपस्थित रहेको जनाईएको छ ।

नापिमा सहायकस्तरका ७ जना, वनमा अधिकृतस्तरका १ र सहायकस्तरका १ जना, मालपोतमा नासु ५ जना र प्राकिरणमा अधिकृतस्तरका ४, सहायकस्तर नासु सो सरह ४, खरिदार सो सरह ८ र कार्यालय सहयोगी ७ जना अनुपस्थित रहेको जनाइृएको छ ।

अनुगमनका क्रममा नागरिक वडापत्र, उजुरी पेटिका, कार्यालयको भौतिक अवस्था गुनासो सुनुवाई, सूचना अधिकारी, स्टाफ बैठक, हाजिरी विवरण, मासिक आर्थिक विवरण सार्वजनिक, कर्मचारीको लिखित कार्यविवरण, सूचनाको सम्बन्धमा भएका गरेका कमजोरी सुधारका लागि निर्देशन दिएको जनाईएको छ । अनुपस्थित हुने कर्मचारीलाई कारण खुलाई पठाउन सम्बन्धित कार्यालयलाई पत्राचार गरेको सहायक प्रजिअ पन्तले जनाए ।