मुलुकले काँचुली फेर्छ, धैर्य गर्नुसः प्रधानमन्त्री ओली

३ असोज, हेटौंडा । प्रधानमन्त्री केपी शर्मा ओलीले मुलुकले काँचुली फेर्ने प्रतिवद्धता दोहोर्याउँदै त्यसका लागि सबैलाई धैर्य गर्न आग्रह गरेका छन् ।
संविधान दिवसको अवसर पारेर काठमाडौंको सैनिक मंच, टुँडिखेलमा आयोजित विशेष समारोहलाई सम्बोधन गर्दै प्रधानमन्त्री ओलीले मुलुकलाई काँचुली फेर्ने अभियानको नेतृत्वमा आफू रहेको उल्लेख गर्दै नेपाली जनताको दशकौंको सपना पूरा हुने दावी गरे ।
प्रधानमन्त्री ओलीले हालसम्म दोहन नगरिएका प्राकृतिक स्रोत, अनुकूल जलवायु, राजनीतिक स्थिरता, क्रियाशिल युवा जनशक्ति रहेको उल्लेख गर्दै यसैको प्रयोगले देशको मुहार फेर्ने दावी गरे ।
प्रधानमन्त्री ओलीले संविधान कार्यान्वयनको सन्दर्भमा कोही पनि पक्ष वा प्रतिपक्ष नहुने उल्लेख गर्दै संविधान कार्यान्वयनमा सबैले हातेमालो गर्नुपर्ने उल्लेख गरे ।
संबोधनका क्रममा प्रधानमन्त्री ओलीले संविधान विरोधी गतिविधिमा संलग्न नेत्र विक्रम चन्द नेतृत्वको नेकपालाई पनि मूलधारमा आउन ढिलाई नगर्न आग्रह गर्दै राजनीतिक आन्दोलनको चरण समाप्त भएकाले राजनीतिको नाममा शान्ति, सुरक्षा र मुलुकको राष्ट्रिय एकतालाई खल्बल्याउने खालका संविधान र कानुन विपरितका गतिविधिमा नलाग्न चेतावनी दिए ।