केशवलाल स्मृति भलिवलको उपाधि थाहानगर जाने पक्का

४ असोज, हेटौंडा । हेटौंडा १७ हटियामा जारी पाँचौ केशवलाल श्रेष्ठ स्मृति जिल्ला स्तरीय भलिबल प्रतियोगिताका लागी थाहानगर भलिबल टिम बज्रबाराही र थाहानगर खेलकुद विकास समिति भिड्ने भएका छन् ।
हटिया स्पोर्ट्स एकेडेमीको आयोजनामा हटियामा जारी प्रतियोगिता अन्तर्गत शुक्रबार सम्पन्न सेमिफाइनल खेलहरु जित्दै दुबै टिमले उपाधि भिडन्त पक्का गरेका हुन् ।
शुक्रबार भएको पहिलो सेमीफाइनल खेलमा गढी गाउँपालिकालाई २५–२२, २५–२३ र २५–१५ को साझो सेटमा हराउँदै थाहानगर खेलकुद विकास समितिले फाइनलमा स्थान बनाएको हो । 
यस्तै दोस्रो सेमीफाइनलमा आग्रा खेलकुद विकास समितिलाई २५–२०, २५–११ र २५–१६ को सोझो सेटमा हराउँदै थाहानगर भलिबल टिम बज्रबाराहीले फाइनलमा स्थान बनायो ।
फाइनल भिडन्त आज शनिबार दिउँसो हुने आयोजक हटिया स्पोर्टस् एकेडेमीका अध्यक्ष छवि सुवेदीले जानकारी दिए । 
प्रतियोगिताको विजेताले नगद ८० हजार र उपविजेताले ४० हजारसहित शिल्ड, मेडल र प्रमाणपत्र प्राप्त गर्नेछन् । यस्तै विधागत उत्कृष्ट खेलाडीले २ हजार र सर्वोत्कृष्ट खेलाडीले ५ हजार रुपैयाँसहित ट्रफी प्राप्त गर्नेछन् । 
यसैगरी प्रतियोगिताको समापनमा हरेक वर्षझै यस बर्षपनि एक खेल पत्रकारलाई स्वर्गीय पदमकुमारी राउत स्मृति ट्रष्टबाट नगद ७ हजार रुपैयाँसहित सम्मान गरिने अध्यक्ष सुवेदीले बताए ।