प्रहरीको सेवा जनतामैत्री हुनुपर्छ : मूख्यमन्त्री पौडेल

२४ असोज, हेटौँडा । ३ नम्बर प्रदेशका मूख्यमन्त्री डोरमणी पौडेलले नेपाल प्रहरीको सेवा जनतामैत्री हुुनुपर्नेमा जोड दिएका छन् । 
६४ औं प्रहरी दिवसको अवसरमा ३ नम्बर प्रदेश प्रहरी कार्यालयले आयोजना गरेको कार्यक्रममा बोल्दै मूख्यमन्त्री पौडेलले नेपाल प्रहरीले शान्ति सुरक्षा कायम गर्न खोलेको भूमिकाको प्रशंसा गर्दै आगामी दिनमा पनि जनतामैत्री ढंगले सेवा प्रवाह गर्नुपर्नेमा जोड दिए । उनले प्रदेश सरकारले पनि प्रदेश प्रहरी गठन गरी सुरक्षालाई जनस्तरसम्म मजबुद र सुदृढ बनाउने मूख्यमन्त्री पौडेलले बताए । 
उनले राज्य विरुद्ध हुने गतिविधि अपराध लगायतको सूचना संकलन, अध्ययन, अनुसन्धानका लागि प्रदेश अनुसन्धान व्यूरो गठन गर्ने समेत कार्यक्रममा जानकारी दिए । स्थानीय स्तरमा सुरक्षाका लागि खटिने सुरक्षाकर्मीहरुका लागि इकाईका भौतिक संरचना दरिलो बनाउन तीनवटै तहका सरकारको समन्वयमा स्रोत साधनको व्यवस्था गर्न र सुरक्षाकर्मीहरुको क्षमता विकासमा प्रदेश सरकारको ध्यान गएको उनको भनाई छ । 
३ नम्बर प्रदेशका प्रहरी नायव महानिरीक्षक शेरबहादुर बस्नेतको सभाध्यक्षतामा भएको कार्यक्रममा बरिष्ठ प्रहरी उपरीक्षक राजेन्द्रप्रसाद चौधरी, मकवानपुरका प्रमुख जिल्ला अधिकारी प्रेमराज जोशी, ३ नम्बर प्रदेशका अनुसन्धान निर्देशक सुनिल ढकाल, अख्तियारको निमित्त प्रमुख अखण्ड शर्मा लगायतको उपस्थिति रहेको थियो । 
कार्यक्रममा अमर प्रहरीका परिवार, विभिन्न जिल्लामा उत्कृष्ट काम गर्ने प्रहरी, खेलकुद कार्यक्रमका उत्कृष्ट र विभिन्न व्यक्तित्वलाई सम्मान गरिएको थियो ।