फेकोफनद्वारा उपमहानगरका जनप्रतिनिधिसंग अन्तरक्रिया

१५ कार्तिक, हेटौँडा । सामुदायिक वन उपभोक्ता महासंघ नेपाल (फेकोफन) ले हेटौँडा उपमहानगरपालिकाका जनप्रतिनिधिसंग अन्तरक्रिया गरेको छ । उपमहानगरपालिकाका मेयर हरिबहादुर महतको प्रमुख आतिथ्यता एवं फोकोफन स्थानीय महासंघ हेटौँडाका अध्यक्ष शम्भुप्रसाद न्यौपानेको सभाध्यक्षतामा कार्यक्रम भएको हो ।
कार्यक्रममा मेयर महतले सामुदायिक वनको विकासको लागि नगरपालिका सदैव सहयोग गर्न तयार रहेको बताए । उनले सामुदायिक वनको माध्यमबाट वनको संरक्षण र विकास भएको भन्दै नगर क्षेत्रभित्र रहेका सबै सामुदायिक वनको हितमा आफुले काम गर्ने बताए । वनसम्बन्धी स्थानीय ऐन ल्याउन सरोकारवालाहरुसंग छलफल गर्ने समेत उनको प्रतिवद्धता थियो ।
कार्यक्रममा हेटौँडा वडा नम्बर ७ का अध्यक्ष एवं वन तथा वातावरण शाखा संयोजक राजन थापा, ६ नम्बर वडा अध्यक्ष अर्जुनप्रसाद चौलागाई, ३ नम्बर वडा अध्यक्ष रामकुमार पुडासैनी, १८ नम्बर वडा अध्यक्ष अनिल बानियाँ, १९ नम्बर वडा अध्यक्ष नरनाथ सुवेदी लगायतले सामुदायिक वन समूहहरुसंग सहकार्य गर्न तयार भएको भन्दै सामुदायिक वन समूहले पनि सहकार्यमा आउनुपर्नेमा जोड दिएका थिए ।
कार्यक्रममा फेकोफन केन्द्रीय अध्यक्ष भारती पाठक, प्रदेश सदस्य रामहरी चौलागाई, मकवानपुर अध्यक्ष साधुराम चौलागाई, विभिन्न सामुदायिक वन समूहका प्रतिनिधि लगायतको सहभागिता रहेको थियो ।