हेटौडामा वन्यजन्तु संरक्षण सचेतना गोष्ठी

२० कार्तिक, हेटौँडा । डिभिजन वन कार्यालय, मकवानपुरले बुधवार हेटौडामा एक दिने वन्यजन्तु संरक्षण सम्वन्धि सचेतना गोष्ठीको आयोजना गरेको छ । कार्यालयको चालु आव ०७६/०७७ को स्वीकृत बार्षिक कार्यक्रम अनुसार गोष्ठीको आयोजना गरिएको हो । 
वन्यजन्तुहरुको संरक्षणको महत्व, अवैध चोरी निकासी नियन्त्रण,वन्यजन्तु संरक्षणका लागि गरिएका प्रयास, कानूनी व्यवस्था, वन्यजन्तु संरक्षणको लागि सरोकारवाला, स्थानीय तह, समुदाय, सामुदायिक वन, विभिन्न संघसंस्थाहरु र विद्यालय लगायतले खेल्नु पर्ने भूमिकाको बारेमा गोष्ठीमा जानकारी गराइएको थियो । 
संकटमा परेका सालक, गैडा, बाघ, कस्तुरी लगायतका वन्यजन्तुहरुको संरक्षणमा सबैको सहयोग अपरिहार्य रहेको सहभागीहरुले सो अवसरमा बताएका थिए । गोष्ठीमा डिभिजन वन कार्यालय, मकवानपुरका प्रमुख ईमनाथ पौडेल, मकालु बरुण राष्ट्रिय निकुन्जका सहायक संरक्षण अधिकृत बद्री विनोद दाहाल, डिभिजन वन कार्यालयका सहायक वन अधिकृत बसन्तराज गौतम, मोहम्मद अतिउल्लाहले सहजीकरण गरेका थिए । 
कार्यक्रममा स्थानीय तहका जनप्रतिनिधि, सामुदायिक वन उपभोक्ता महासंघका पदाधिकारी, सामुदायिक वनका पदाधिकारी, विद्यार्थी र संचारकर्मीको सहभागिता रहेको थियो ।