सामुदायिक वनले मंसिर ६ गते हेटौडामा प्रर्दशन गर्ने

२ मंसिर, हेटौडा । सामुदायिक वनमा लगाईएको तेहेरो कर विरुद्ध हेटौडामा प्रर्दशन हुने भएको छ । फेकोफन जिल्ला शाखा र प्रदेश नम्बर ३ ले  सोमबार हेटौडामा संयुक्त बैठक बसी विरोध र्यालीको आयोजना गर्ने निर्णय गरेका हुन । 
मंसिर ६ गते हुने विरोध कार्यक्रमको लागि महासंघले सबै सामुदायिक वन उपभोक्ताहरुलाई व्यानर सहित उपस्थित हुन पत्राचार समेत गरेको छ ।
फेकोफन प्रदेश नम्बर ३ की कोषाध्यक्ष निर्मला न्यौपानेले सरकारले सामुदायिक वन माथि अनावश्यक कर लगाएको भन्दै फिर्ता लिन आग्रह गरिन् । स्थानीय उपभोक्ताहरुको अथक मेहनत र परिश्रमबाट सामुदायिक वनको विकास भएको वहाँको भनाई थियो । सरकारको ‘गिद्धे नजर’ सामुदायिक वनमाथि परेको भन्दै अव उपभोक्ताहरुले करको डटेर सामना गर्नु पर्नेमा न्यौपानेको जोड थियो ।
सामुदायिक वन उपभोक्ता महासंघ, मकवानपुरका अध्यक्ष साधुराम चौलागाईको अध्यक्षतामा भएको छलफल कार्यक्रममा प्रदेश नं. ३ का सदस्य रामहरि चौलागाई, अर्जुनप्रसाद दाहाल, फेकोफन स्थानीय महासंघ, हेटोडाका अध्यक्ष शम्भुप्रसाद न्यौपाने, विभिन्न सामुदायिक वनका अध्यक्षहरु र संचारकर्मीहरुको कार्यक्रममा सहभागिता थियो । 
यसैगरी, सामुदायिक वन उपभोक्ता महासंघ, मकवानपुरको आयोजना र डिभिजन वन कार्यालय, मकवानपुरको सहयोगमा हेटौडामा १ दिने सामुदायिक वनको शसक्तीकरण विषयक अन्तरक्रिया कार्यक्रमको आयोजना गरिएको छ । फेकोफन मकवापुरका अध्यक्ष साधुराम चौलागाईको अध्यक्षतामा भएको कार्यक्रममा फेकोफन प्रदेश नं. ३ की कोषाध्यक्ष निर्मला न्यौपानेको प्रमुख आतिथ्यता रहेको थियो । 
कार्यक्रममा फेकोफन प्रदेश ३ का सदस्य रामहरि चौलागाई, अर्जुनप्रसाद दाहाल, फेकोफन स्थानीय महासंघ, हेटोडाका अध्यक्ष शम्भुप्रसाद न्यौपाने, विभिन्न सामुदायिक वनका प्रतिनिधि र संचारकर्मीको सहभागिता रहेको थियो ।