शान्ति स्थापनामा स्व. कोइरालाको महत्वपूर्ण भूमिका 

७ मंसिर, हेटौँडा । लोकतान्त्रिक गणतन्त्र र देशमा शान्ति स्थापनाका लागी नेपाली कांग्रेसका पूर्व सभापति एवम् पूर्व प्रधानमन्त्री स्वर्गिय गिरिजाप्रसाद कोइरालाको महत्वपूर्ण भूमिका रहेको बताइएको छ ।
गिरिजाप्रसाद कोइराला फाउण्डेशन मकवानपुरले हेटौंडामा आयोजना गरेको गिरिजाप्रसाद कोइराला जीवन वृतः एक चर्चा अन्तरक्रिया कार्यक्रमका वक्ताहरुले यस्तो बताएका हुन् । 
वृहत शान्ति सम्झौता भएको ऐतिहासिक दिनको सम्झनामा शनिबार हेटौँडामा आयोजना गरिएको कार्यक्रममा बोल्दै फाउन्डेसनका सल्लाहकार गोपाल कृष्ण घिमिरेले स्वर्गीय गिरिजा प्रसाद कोइरालाले द्वन्द्वकालीन नेपालको शान्ति स्थापनामा निभाउनुभएको भुमिकालाई सबैले मनन गर्नुपर्ने बताए । 
उनले स्वर्गिय गिरिजा प्रसाद कोइरालाकै पहलमा देशमा शान्ति पुर्नबहाली भएको दावी समेत गरे । उनले नेपालमा लोकतन्त्र को स्थापना र बिकासमा काँग्रेसले नेतृत्वदायी भुमिका निभाउँदै आएको उल्लेख गर्दै आगामी दिनमा नेपाली काँग्रेसले लोकतन्त्र पक्षधरहरु सँग हातेमालो गर्दै जानुपर्ने सुझाव दिए ।
कार्यक्रमका सहभागिहरुले कोइरालाले जीवनका अन्तिम क्षणहरुमा गम्भिर राजनितिज्ञको भुमिका निभाएको उल्लेख गरेका थिए । 
फाउन्डेसनका मकवानपुर संयोजक नारायण प्रसाद लम्सालको अध्यक्षतामा भएको कार्यक्रममा काँग्रेस मकवानपुरका निवर्तमान सभापति रघुरमण न्यौपाने, जिल्ला सचिव बुद्ध लामा, प्रवक्ता प्रदीप कोइराला, प्रतिष्ठानका प्रदेश ३ का संयोजक रीता खनाल, बामपन्थी वुद्धिजीवी श्रीचन्द्र शर्मा, प्राध्यापक कृष्ण दाहाललगायतले मन्तव्य ब्यक्त गरेका थिए ।