विश्वभर कोरोना संक्रमितको संख्या २ करोड १६ लाख नाघ्यो

३२ साउन, हेटौंडा । विश्वभर कोरोना भाइरस संक्रमितको संख्या दुई करोड १६ लाख नाघेको छ । 
यो समाचार तयार पार्दसम्म विश्वका दुई करोड १६ लाख ४ हजार १ सय ३७ जना मानिसमा कोरोनाको संक्रमण पुष्टि भएको वर्ल्डोमिटरले जनाएको छ ।
कोरोना भाइरस संक्रमणको कारण विश्वभर सात लाख ६८ हजार ७ सयभन्दा धेरेको मृत्यु भएको छ भने कोरोना संक्रमण भएका मध्ये एक करोड ४३ लाख २३ हजार भन्दा धेरै मानिस संक्रमणमुक्त भएका छन् । 
अहिले विश्वमा ६५ लाख १२ हजार २ सयभन्दा धेरै सक्रिय संक्रमित रहेका छन् । उनीहरुमध्ये ६४ हजार ४ सयभन्दा धेरै मानिस गम्भीर अवस्थामा रहेका छन् । 
चीनको हुबेई प्रान्तको वुहान शहरबाट गएको डिसेम्बर महिनाको अन्त्यबाट सुरु भएको कोरोना भाइरस अहिलेसम्म विश्वका दुई सय १६ देश तथा विभिन्न क्षेत्रमा पुगिसकेको विश्व स्वास्थ्य सङ्गठन (डब्ल्यूएचओ) ले जनाएको छ ।
अहिलेसम्म सबैभन्दा धेरै अमेरिकामा ५५ लाख २९ हजार ७ सयभन्दा धेरैमा कोरोना भाइरसको संक्रमण पुष्टि भएको छ । अमेरिकामा कोरोनाका कारण एक लाख ७२ हजार ६ सयभन्दा धेरैको मृत्यु भएको छ । 
यस्तै दोस्रो धेरै प्रभावित देशमा ब्राजिल रहेको छ । ब्राजिलमा ३३ लाख १७ हजारभन्दा धेरैमा संक्रमण पुष्टि हुँदा एक लाख ७ हजार २ सय भन्दा धेरैको मृत्यु भएको छ ।
यसैगरी तेस्रो धेरै प्रभावित रहेको भारतमा २५ लाख ८९ हजारभन्दा धेरैमा संक्रमण पुष्टि हुँदा ५० हजार भन्दा धेरै मासिनको मृत्यु भइसकेको छ ।