पालिकास्तरिय फुटबलः भीमफेदीको विजयी सुरुवात

५ चैत, हेटौंडा । जिल्ला खेलकुद विसका समितिको आयोजनामा हेटौंडामा शनिबारबाट सुरु भएको दोस्रो अन्तरपालिका पुरुष फुटबल प्रतियोगिता–२०७९ मा भीमफेदी गाउँपालिकाले विजयी सुरुवात गरेको छ ।
भीमफेदीले कैलाश गाउँपालिकालाई टाइब्रेकरमा ४–२ गोलअन्तरले पराजित गर्दै दोस्रो चरणमा प्रवेश गरेको हो । निर्धारित समय २–२ गोलको बराबरीमा टुंगिएपछि खेलको निर्णय सिधै टाइब्रेकरबाट गरिएको थियो । 
टाइब्रेकरमा भीमफेदीको तर्फबाट रामराज शाही, श्रीजन दानी, समन डंगोल र अर्पण घलनाले गोल गरेका थिए । कैलाशको तर्फबाट अजय गुरुङ र सूर्य थिङले गोल गर्दा सजन जिम्बा र विकल मोक्तान गोल गर्नबाट चुकेका थिए । 
निर्धारित समयमा  भीमफेदीको तर्फबाट सविन घले र श्रीजन दानीले गोल गर्दा कैलाश गाउँपालिकाको तर्फबाट सुमनसिं स्याङ्तान र विकल मोक्तानले गोल गरेका थिए । 
जिल्ला समन्वय समिति मकवानपुरको आर्थिक सहयोगमा सुरु प्रतियोगितामा जिल्लाको दशवटा स्थानीय तहको सहभागिता रहेको छ । प्रतियोगिता चैत ११ गतेसम्म सञ्चालन हुनेछ ।
प्रतियोगिताको विजेताले दुई लाख र उपविजेताले एक लाख रुपैयाँसहित सिल्ड, मेडल र प्रमाणपत्र पाउनेछन् । प्रतियोगिताका सर्वोत्कृष्ट खेलाडीले नगद १० हजार पुरस्कार प्राप्त गर्नेछन् ।