आज हेटौँडामा मिस्टर मकवानपुर २०८० हुने

१३ असोज, हेटौँडा । नेपाल शारीरिक सुगठन तथा फिट्नेस महासंघ मकवानपुरको आयोजनामा आज शनिवार हेटौंडामा पहिलो पटक मिस्टर मकवानपुर भेट्रान्स तथा महिला फिजिक्स प्रतियोगिता हुने भएको छ । 
हेटौँडा २ मा रहेको पल्पसा प्याराडाइजमा हुने मिस्टर मकवानपुर २०८० मा  मिस्टर मकवानपुर, वेष्ट फिजिक्स वुमन च्याम्पियनसीप र मिस्टर मकवानपुर भेट्रान्स गरी तीन विधामा प्रतिस्पर्धा हुन लागेको हो । 
तीन विधामा गरी ५० जना खेलाडीहरुको सहभागिता रहने प्रतियोगितामा ५५ औं एसियन बडिबिल्डिङ च्याम्पियन वुमन फिजिक्स तर्फ ५५ केजीमा गोल्ड मेडलिस्ट रजनी श्रेष्ठको प्रशिक्षण तथा प्रदर्शन पनि रहने अध्यक्ष भेट्वालले बताए ।
प्रतियोगिताका संयोजक सुनिल लोप्चनका अनुसार मिस्टर मकवानपुर विधामा ५५, ६०, ६५, ७०, ७५ केजी तौल समूहमा प्रतिस्पर्धा हुने छ भने वेष्ट फिजिक्स वुमन च्याम्पियनसीप मिस्टर मकवानपुर भेट्रान्स विधामा प्रतिस्पर्धा गराईने छ । 
मिस्टर मकवानपुरको विजेतालाई एक लाख, द्वितियलाई ५० हजार र तेस्रो हुनेलाई तीस हजार नगद सहित ट्रफि र मेडल प्रदान गरिने प्रतियोगिता संयोजक लोप्चनले जानकारी दिए ।
महासंघका अध्यक्ष भेटवालले शारीरिक सुगठन तथा फिट्नेसमा भेट्रान्सहरुलाई समेटेर प्रतियोगिता गर्न लागेको नेपाल मै यो पहिलोपटक भएको दावी गरे । उनले बिशेषगरी शारीरिक सुगठन तथा फिट्नेसमा लागेका र स्वस्थ्य जिवन जिउनको लागी सबैलाई प्रेरण मिलोस भन्ने उद्देश्यले मिस्टर मकवानपुर भेट्रान्स विद्यालाई प्रतियोगितामा समेटिएको बताए । 
हेटौँडा उपमहानगरपालिकासहित मकवानपुरका दशवटै पालिकाहरुको आर्थिक सहयोगमा आयोजना गर्न लागिएको पनि अध्यक्ष भेट्वालले जानकारी दिए । प्रतियोगिता सम्पनन गर्नका लागी करिब १३ लाख रुपैयाँ खर्च लाग्ने अनुमान गरिएको पनि अध्यक्ष भेट्वालले बताए ।