नगरकप भलिबल प्रतियोगिताः महिलातर्फ ९ नम्बर फाइनलमा

file photo

१५ मङ्सिर, हेटौँडा । हेटौंडा १९ नेवारपानीमा जारी छैठौं संस्करणको उपमेयर नगरकप महिला तथा पुरुष भलिबल प्रतियोगितामा पुरुषतर्फ सेमिफाइनल समिकरण पूरा भएको छ । शुक्रबार भएको क्वार्टरफाइनल खेलबाट जित निकाल्दै वडा नम्बर १७, ५, १९ र ११ सेमिफाइनल प्रवेश गरेका हुन् । 
१७ ले १० लाई २५–१६ र २५–२० को सोझो सेटमा हराएको हो । हेटौंडाको ६ नम्बर वडाले सुरुवाती अग्रतालाई जोगाउन नसक्दा ५ नम्बर वडालाई नतिजा सुम्पेको छ । ५ नम्बर वडा २०–२५, २५–२३ र १५–१० को सेटमा विजयी भएको हो । शुक्रबारै भएको खेलमा १९ नम्बरले१२ संग कठिन जित निकाल्दै सेमिफाइनल प्रवेश गर्यो । 
१९ ले १२ लाई २५–१८, १८–२५ र १५–१० को सेटमा पराजित गरेको हो । अन्तिम क्वार्टरफाइनल खेलमा ११ ले १६  लाई सोझो सेटमा हरायो । ११ नम्बर वडा २५–१२ र २५–११ को सेटमा विजयी भएको हो । 
जारी प्रतियोगितामा महिलातर्फ ९ नम्बर वडा फाइनल प्रवेश गरेको छ । महिलातर्फलो पहिलो सेमिफाइनलमा ९ ले १४ लाई हराउँदै उपाधी भिडन्त पक्का गरेको हो । ९ ले १४ लाई २२–२५, २५–२३, २५–११, २५–१९ को सेटमा पराजित गर्दै फाइनलमा स्थान बनाएको हो । 
१७ र १२ नम्बर वडाबीचको दोस्रो सेमिफाइनल भने रात परेको कारण स्थगित भएको छ । खेल जारी रहँदा रातपरेपछि शनिबार बिहान खेल्ने गरी स्थगित गरिएको आयोजकले जनाएको छ । प्रतियोगितामा पुरुषतर्फ उपमहानगरका १२ वडा र महिलातर्फ ७ वटा वडाको सहभागिता रहेको छ । 
प्रतियोगितामा प्रथम हुने वडाले ५० हजार, द्वितीय हुनेले ३० हजार र सान्त्वना हुनेले १० हजार रुपैयाँसहित शिल्ड, मेडल तथा प्रमाणपत्र प्राप्त गर्नेछन् । विधागत उत्कृष्ट खेलाडीहरुका लागि पनि पुरस्कारको व्यवस्था गरिएको आयोजकले जनाएको छ । गत वर्ष भएको उपमेयर कपको पाँचौ सस्करणको उपाधि महिलातर्फ १९ नम्बर वडा र पुरुषतर्फ ११ नम्बर वडाले जितेको थियो ।