हेटौंडा–११ सिमलटारमा खेल मैदानको उद्घाटन

३१ जेठ, हेटौंडा । हेटौंडा उपमहानगरपालिका वडा नम्बर ११ सिमलटारमा निर्माण सम्पन्न खेलमैदानको बुधबार उद्घाटन भएको छ । खेल मैदानको हेटौँडा उपमहानगरपालिकाका नगर प्रमुख मीनाकुमारी लामा र उपप्रमुख राजेश बानियाँले संयुक्त रुपमा उद्घाटन गरेका हुन् । 
हेटौँडा उपमहानगरपालिकाको १० र हेटौंडा ११ नम्बर वडाको १० लाख गरी २० लाख रुपियाँको लागतमा खेल मैदान निर्माण गरीएको हो । खेल मैदानको उद्घाटन गर्दै नगर प्रमुख लामाले खेलकुदको बिकासका लागि पुर्वाधार निर्माणको कामलाई गति दिएको बताइन् । खेलाडि उत्पादन र खेल क्षेत्रको बिकासका लागि नगरका १९ वटै वडाहरुमा खेलमैदान निर्माणका लागि चालु आथिक बर्षमा बजेट बिनियोजन गरी काम भैरहेको उनले जानकारी दिइन् ।
कार्यक्रममा उपप्रमुख बानियाँले खेल मैदानको थप व्यवस्थापनका लागि उपमहानगरले निरन्तर सहयोग गर्ने प्रतिवद्धता व्यक्त गरे । उनले अहिले खेलकुद मैदान मात्रै निर्माण गरिएको भएपनि भविष्यमा यसलाई स्टेडियमका रुपमा विकास गर्न सकिने बताए ।
सिमलटार टोल बिकास सस्थाका अध्यक्ष सुर्यमान लामाको अध्यक्षतामा भएको कार्यक्रममा ११ नम्बरका वडा अध्यक्ष जुना दाहाल, एन्फाका केन्द्रीय सदस्य टिकाराम लामा, नगर खेलकुद बिकास समितिका अध्यक्ष रबिन्द्र घिमिरे लगाएतले खेलकुदको माध्यमबाट स्वस्थ्य र अनुशासित जिवन जिउन सकिने बताए । कार्यक्रममा खेलमैदान निर्माणका लागि महत्वपुर्ण भूमिका निर्वाह गर्ने व्यक्ति र संस्थाहरुलाई सम्मान समेत गरिएको थियो ।