बंगलादेशद्वारा नेदरल्यान्ड्सविरुद्ध २५ रनको जित हासिल

३२ जेठ, हेटौंडा । आईसीसी ट्वान्टी–२० विश्वकपमा बंगलादेशले नेदरल्यान्ड्सविरुद्ध २५ रनको जित निकालेको छ ।
बिहीबार किंग्सटाउनमा भएको खेलमा बंगलादेशले प्रस्तुत गरेको १६० रनको लक्ष्य पछ्याउने क्रममा डच टिमले निर्धारित २० ओभरमा आठ विकेट गुमाएर १३४ रनमात्र बनाएको हो ।
नेदरल्यान्ड्सका साइब्रान्ड एंगलब्रेटले ३३ रन बनाए । विक्रमजित सिंहले २६, कप्तान स्कट एड्वार्ड्सले २५, माइकल लेभिटले १८, आर्यन दत्तले १५ र म्याक ओडोडले १२ रन बनाए । बंगलादेशका रिसाद हुसैनले तीन विकेट लिए । तक्षिन अहमेदले दुई, मुस्ताफिजुर रहमान, तान्जिन हसन सान्टो र महमुदुल्लाहले समान एक/एक विकेट हात पारे ।
त्यसअघि टस हारेर ब्याटिङ गरेको बंगलादेशले निर्धारित २० ओभरमा पाँच विकेट गुमाएर १५९ रन बनायो । साकिब अल हसनले सर्वाधिक ६४ रन बनाए । तान्जिन हसनले ३५ रन, महमदुल्लाहले २५ रन र जाकेर अलीले १४ रन बनाए । नेदरल्यान्ड्सका आर्यन दत्त र पाउल भान मिकेरेनले समान दुई/दुई विकेट लिए । टिम प्रिंगलले एक विकेट हात पारे ।
जितसँगै तीन खेलबाट चार अंक जोडेको बंगलादेशले सुपर–८ को सम्भावना बलियो बनाएको छ । बंगलादेश तालिकाको दोस्रो स्थानमा छ । समान खेलबाट दुई अंक जोडेको नेदरल्यान्ड्स तालिकाको तेस्रो स्थानमा छ ।