सुरुङमार्गमा लगानी गर्न सरकारलाई महासचिव राउतको सुझाव

२२ चैत, हेटौंडा । मकवानपुर उद्योग वाणिज्य संघका महासचिव महेन्द्र राउतले हेटौँडा–काठमाण्डौं सुरुङमार्गमा लगानी गर्न सरकारलाई सुझाव दिएका छन् । अर्थमन्त्री कृष्णबहादुर महरालाई मकवानपुर उद्योग बाणिज्य संघको ५३ बुँदे ध्यानाकर्षण पत्र बुझाउँदै महासचिव राउतले यस्तो सुझाव दिएका हुन् ।

अर्थ मन्त्रालयको आयोजनामा बीरगंजमा भएको ‘बजेट तर्जुमा सन्दर्भमा सरोकारवालाबीचको अन्तरक्रिया’ कार्यक्रममा महासचिव राउतले सरकारले आगामी आवका लागि तर्जूमा गर्ने बजेटमा निजी क्षेत्रको विषयलाई अझ सशक्त रुपमा ल्याउन ५३ बुँदे ध्यानाकर्षणपत्र बुझाएका छन् । कार्यक्रममा राउतले हाल बजारमा देखिएको न्युन विजकीकरणको समस्या समाधान, हेटौँडमा हाल निर्माणाधीन औद्योगिक क्षेत्रको भौतिक संरचनाको लागि पर्याप्त बजेट विनियोजन गर्न लगायतका विषयमा सरकारको ध्यानाकर्षण गराए ।

मकवानपुर अदुवा उत्पादक संघका अध्यक्ष गोपालप्रसाद गौतमले नेपाली अदुवा निकासीमा लगाईएको रोकलाई तत्काल हटाउन भारत सरकारसँग पहलका लागि आग्रह गरेका थिए । कार्यक्रममा मकवानपुरसहित चितवन, बारा, पर्सा, रौतहटका उद्योगी व्यवसायी तथा सम्बद्ध संघसंस्थाहरुको सहभागिता रहेको थियो ।