ब्लड बैंकमा रक्तदाता आउन थालेपनि अझै रगत अभाव कायमै

२५ चैत, हेटौंडा । कोरोना संक्रमणको जोखिमका कारण हेटौंडामा रगतको अभाव कायमै रहेको छ । कोरोना संक्रमणको जोखिम र सरकारले गरेको लकडाउनका कारण नेपाल रेडक्रसबाट संचालित ब्लड बैंक हेटौंडामा रगतको अभाव कायमै रहेको हो । 
बैंकमा अहिले ओ पोजेटिभ, ए पोजेटिभ, एबि पोजेटिभ र बि पोजेटिभ समूहको रगतको अभाव रहेको र फोन गरेर रक्तदातालाई बोलाउनु परिरहेको व्लड बैंकका प्रमुख टंकप्रसाद दाहालले बताए । प्रष्टखबरमा समाचार प्रकाशित भएपछि रक्तदाताहरु ब्लडबैंक पुगेर रगत पनि दिन थालेको उनले बताए । ‘तपाईहरुको समाचारले ठूलो सहयोग पुग्यो, अहिले रक्तदाताहरु आएर रक्तदान गरिरहनु भएको छ तर अझै अभाव चैं छ ।’ सोमबार अपरान्ह प्रष्टखबर टोली पुग्दा पनि रक्तदान भईरहेको थियो । सोमबार १२ जनाले रक्तदान गरेका थिए ।
दैनिक १० देखि १५ युनिट रगत माग भएपनि पुर्याउन नसकिएको दाहालले बताए । चुरेहिल अस्पतालमा हुने मिर्गौलाको डायलासिसका साथै अन्य अस्पतालमा अपरेशन र रक्तअल्पताका विरामीका लागि रगतको माग हुने गरेको दाहालको भनाई छ । रगत अभाव कम गर्न इच्छुक रक्तदाताले ब्लड बैंकको फोन नम्बर ०५७-५२२९७७ मा फोन गरे सम्बन्धित स्थानमै गएर रगत संकलनको तयारी भईरहेको छ । ब्लड बैंक प्रमुख दाहाल (९८४५०२९९७७) र विष्णु रिमाल (९८४५०३०७७५) संग सम्पर्क गरी रगत संकलनमा सहयोग गरिदिन उनीहरुले आग्रह गरेका छन् ।

यो पनि पढ्नुस्
हेटौंडामा रगत अभाव, फोन गरेर संकलन गरिंदै