अमेरिकामा कोरोनाबाट मर्नेको संख्या ८५ हजार नाघ्यो

१ जेष्ठ, हेटौंडा । अमेरिकामा कोरोना भाइरस अर्थात कोभिड १९ बाट मर्नेको संख्या ८५ हजार नाघेको छ ।
कोभिड १९ को तथ्याङक प्रस्तुत गरिरहेको वल्डोभिटरका अनुसार अमेरिकामा पछिल्लो २४ घण्टामा १ हजार ७ सय ७२ जनाको मृत्यु भएको छ । यो सँगै यहाँ संक्रमणबाट मर्नेको कुल संख्या ८५ हजार १ सय ९७ पुगेको छ ।
अहिलेसम्म अमेरिकामा १४ लाख ३० हजार ३ सय ४८ जना मानिस संक्रमित भएका छन् । यहाँ एकैदिन थप २१ हजार ७ सय १२ जना नयाँ संक्रमित थपिएका छन् ।
अमेरिकामा १६ हजार ३ सय ४९ जना संक्रमितको अवस्था गम्भिर रहेको छ भने ३ लाख १० हजार २ सय ५९ जना उपचारपछि स्वस्थ्य पनि भएका छन् । 
अमेरिकामा कोरोना संक्रमणबाट सबैभन्दा बढी न्युयोर्क राज्य प्रभावित भएको छ । यहाँ अहिलेसम्म २७ हजार २ सय ९० जनाको ज्यान गएको छ । 
यस्तै अमेरिकाको दोस्रो प्रभावित राज्य न्यूजर्सीमा ९ हजार ७ सय २७  जनाको मृत्यु भएको छ । यसैगरी मासाचुसेट राज्यमा ५ हजार ३ सय १६ जनाको मृत्यु भएको छ भने मिचिगनमा ४ हजार ७ सय १४ जनाको मृत्यु भएको छ । 
यसैगरी अमेरिकाका लुसियाना, क्यालिफोर्निया, इलिनोइस, कनेक्टिकट, पेन्सिलभानिया, फलोरीडा जस्ता राज्यहरु कोरोना संक्रमणबाट बढी प्रभावित भएका छन् ।