प्रधानमन्त्रीबाट फाष्ट ट्रयाक शिलान्यास

१४ जेठ, बारा । राष्ट्रिय गौरवको आयोजनामध्ये सर्वाधिक चर्चामा रहेको काठमाडौं–निजगढ द्रुतमार्ग (फाष्ट ट्र्याक) को प्रधानमन्त्री पुष्पकमल दाहालले शिलान्यास गरेका छन् । बाराको निजगढका आइतबार विशेष समारोहको आयोजना गरी प्रधानमन्त्री दाहालले फाष्ट ट्रयाकको शिलान्यास गरेका हुन् ।

कार्यक्रममा बोल्दै प्रधानमन्त्री दाहालले फाष्ट ट्रयाकको निर्माणले तराई र पहाडबीच भावनात्मक सम्बन्ध बलियो हुने बताए । उनले यसले देशको समृद्धिमा समेत योगदान पु¥याउने दावि समेत गरे । शिलान्यास कार्यक्रममा रक्षामन्त्री बालकृष्ण खाँड, भौतिक योजना तथा पूर्वाधार विकास मन्त्री रमेश लेखक, सेनाका प्रधानसेनापति राजेन्द्र क्षेत्री लगायतको सहभागिता रहेको थियो । ७६ किमी दुरीको उक्त द्रुतमार्ग नेपाली सेनाले आगामी ४ वर्षमा पूरा गर्ने अठोटका साथ निर्माण कार्य शुरु गरेको छ। द्रुतमार्गको निर्माण लागत एक खर्ब १२ अर्ब अनुमान गरिएको छ। ललितपुरको खोकनाबाट शुरु भई बाराको निजगढमा पुगेर पूर्व–पश्चिम राजमार्गमा जोडिने मार्गको ट्र्याक खोल्ने जिम्मा सरकारले नेपाली सेनालाई २०६६ मा दिएको थियो।

सेनाले मार्गको ट्र्याक खोल्ने काम २०७० सालको प्रारम्भमै पूरा गरेको थियो । फाष्ट ट्रयाकमा साना ठूला गरी १०० को हाराहारीमा पुल निर्माण गरिने छ।  द्रुतमार्गमा निर्माण हुने पुलको लम्बाइ मात्र जोड्दा पनि नौ किलो मिटर भन्दा बढी हुने सहायकरथी एवम् विकास निर्माण निर्देशक उद्धव विष्टले जानकारी दिए। मकवानपुरको ठिङगनमा १.४ किलोमिटर लामो सुरुङ निर्माण हुने छ। फाष्ट ट्रयाक निर्माणपछि तराईबाट राजधानी पुग्न डेढ घन्टा मात्रै लाग्ने जनाईएको छ ।

राजधानीलगायतका क्षेत्रमा ल्याइने पेट्रोलियम पदार्थको ढुवानीमा खर्च हुँदै आएको रकममा वार्षिक रुपमा  १० अर्ब बचत हुने विश्वास गरिएको छ । दायाँबायाँ ५० मिटर दिएर जग्गा अधिग्रहण गरिएको २२ मिटर चौडाइ हुने मार्ग चार लेनको हुने जनाईएको छ ।