कांग्रेस मकवानपुरगढीले माग्यो पालिकासंग खर्चको यथार्थ विवरण

२१ बैशाख, हेटौंडा । नेपाली कांग्रेस मकवानपुरगढी गाउँपालिकाले चालु आर्थिक बर्ष ०७७/०७८ मा मकवानपुरगढी गाउँपालिका कार्यालयबाट भएको खर्चको यथार्थ विवरण माग गरेको छ । कांग्रेस गाउँपालिका सभापति राजबीर मोक्तान र तरुण दल गाउँपालिका अध्यक्ष सानुकान्छा थिङले संयुक्त रुपमा विभिन्न क्षेत्रमा भएका खर्च र कामको यथार्थ विवरण माग गरेका हुन् ।
कांग्रेसले आर्थिक बर्ष ०७७/०७८ मा सिलिङ बजेट बाहेक पालिकाको बजेट अध्यक्षको होल्डिङमा कहाँ के के खर्च भयो, चालु आर्थिक बर्षमा कसलाई कति अनुदान वितरण भयो र यसको आधार के हो, घरघरमा काम हातहातमा दाम, असहायसंग अध्यक्ष जस्ता शिर्षकमा कसलाई रकम वितरण भयो र लाभान्वित बर्ग छनौटको आधार के हो, चैत १६ देखि ३१ गतेसम्म सामरी खोलामा उत्खनन गरिएकोमा कति परिमाणमा निकाल्ने अनुमतिथियोर कति परिमाणमा निकालियो यथार्थ हिसावकिताव सार्वजनिक गर्न माग गरिएको छ ।
त्यस्तै, ७ वटा प्वाइन्टमा नदिजन्य पदार्थ उत्खनन गर्दा आवश्यक उपकरण को संगै लिईयो र के आधारमा कति दर रेटमा लिईयो मापदण्ड सर्वाजनिक गर्न, नदिजन्य पदार्थ उत्खनन गर्दा आवश्यक मानव स्रोत आफ्ना मुठ्ठीभरका व्यक्तिमात्रै शंकास्पद तरिकाले परिचालन गरिएकाले जनसमुदायमा आशंका फैलिएकोले यसबारे सार्वजनिक गर्न र कोरोनाको मारमा परेका जनताको आर्थिक अवस्था नाजुक रहेकाले स्थानीयस्तरमा नदिजन्य पदार्थ प्रयोगगर्दा छुटको व्यवस्थागर्नुपर्ने माग गरिएको छ ।
आफुहरुले माग गरेको विषयमा यथार्थ जानकारी नआए नदिजन्यपदार्थ ओसारपसार गर्ने कार्य रोक्न बाध्य हुने र न्यायिक ढोकामा जान बाध्य हुने जनाईएको छ ।