मकवानपुर र ललितपुरका दुर्गम गाउँमा केबल टिभि र इन्टरनेट पुर्याउँदै जयकालिका

१३ जेठ, हेटौंडा । केबल टेलिभिजन र इन्टरनेट वितरक कम्पनी जयकालिका मल्टिमिडिया प्रालिले मकवानपुर र ललितपुरका दुर्गम गाउँमा केबल टेलिभिजन र इन्टरनेट पुर्याईरहेको छ ।
पूर्वी मकवानपुरको बागमती र बकैया गाउँपालिकादेखि उत्तरको इन्द्रसरोबर गाउँपालिकाका गाउँहरू र ललितपुरको बागमती गाउँपालिकाका पियुटार, खयरघारी, माझखन्ड लगायत स्थानहरुमा अप्टिक फाइबरमार्फत केबल टेलिभिजन र इन्टरनेट पुर्याएको हो ।  'अब हामीले फाइबर पुर्याएका मकवानपुर र ललितपुरका दुर्गम भेगमा स्थानीयले केबल तथा आईपि टिभि र ब्रोडब्यान्ड ईन्टरनेटको सुविधा पाउनेछन्'-जयकालिकाका संचालक सरोज न्यौपानेले भने । गाउँमा फाईबर पुगेसंगै कोरोना महामारीका कारण बन्द विद्यालयहरूले अनलाइन क्लास समेत शुरू गरेको उनले बताए । सर्वसाधारण मात्रै नभई शैक्षिक संस्था, बैंक तथा वित्तीय संस्था, सहकारी, सामाजिक संस्था, व्यसायिक लगायतका क्षेत्रले यसबाट लाभ हासिल गर्नेछन् ।
मकवानपुर र ललितपुरका दुर्गम गाउँका स्थानीय खुशी भएका छन् । 'पहिला डाटाबाट राम्रो नेट नचल्दा धेरै कुरा गर्न सकिदैन थियो, टिभि पनि त्यस्तै अवस्था थियो'-स्थानीयहरू भन्छन्-'अब गाउँमा दुबै सुविधा पाउँदा खुशी लागेको छ ।'
जयकालिकाले पनि ग्राहकको सन्तुष्टिका लागि गुणस्तरीय सेवा दिने जनाएको छ । अहिले गाउँमा फाइबर पुगेसंगै मकवानपुर र ललितपुरका दुर्गम भेगमा ग्राहक बढ्ने क्रम शुरू भएको बताउँदै न्यौपानेले यसलाई व्यवस्थित गर्दै गुणस्तरीय सेवा दिने र थप दुर्गम गाउँमा सेवा विस्तार गर्ने य‍ोजना रहेको बताए ।